माइतीघरमा आन्दोलन गर्ने किसान नभएको मन्त्री भट्टसामु उद्योगीहरुको दाबि !

काठमाडौं – किसानलाई उखुको मूल्य भुक्तानी गरेको विवरण पेश गर्न उद्योग, वाणिज्य तथा आपूर्ति मन्त्री लेखराज भट्टले चिनी उद्योगीलाई २४ घण्टे अल्टिमेटम दिएका छन् ।

आन्दोलनरत किसानसँग गर्ने भनिएको वार्ता हुन नसकेपछि उद्योगीसँग वार्ता भएको र पुनः वार्ताका लागि आन्दोलनरत किसानलाई बोलाइएको छ ।

उता चिनी उद्योगीहरुले भने माइतीघरमा आन्दोलन गरिरहेका उखु किसान बास्तविक किसान नै नभएको आरोप लगाएका थिए ।

छलफलमा उद्योगीहरुले मन्त्री लेखराज भट्टसँग माइतीघर मण्डलामा आन्दोलन गर्ने व्यक्तिहरु उखुकिसान नभएको जिकिर गरे ।

मन्त्री भट्टले उद्योगीहरुले आन्दोलन गर्न आउने व्यक्तिहरु उखु किसान नभएर विचौलिया दाबी गरेको बताए ।

मंगलबार विहान ११ बजे उद्योग मन्त्रालयले आयोजना गरेको छलफलमा कृषिमन्त्री र गृहमन्त्री पनि सहभागी हुने मन्त्री भट्टले जानकारी दिए ।

उखुको भुक्तानी नपाएका सर्लाहीका किसानले काठमाडौंमा प्रदर्शन थालेको दोस्रो दिन सोमबार मन्त्रालयमा उद्योगीसँगको छलफलमा मन्त्री भट्टले आजसम्म विवरण पेश गर्न निर्देशन दिएका हुन् ।