दलहरुबीच छलफल नै नगरी एकलौटी ढंगले बजेट ल्याएको अध्यक्ष यादवको आरोप

जनता समाजवादी पार्टीका अध्यक्ष एवं प्रतिनिधि सभा सदस्य उपेन्द्र यादवले सरकारले गठबन्धनमा रहेका दलहरुबीच छलफल नै नगरी एकलौटी ढंगले बजेट ल्याएको आरोप लगाएका छन् । आज (बिहीबार) पत्रकार सम्मेलनलाई सम्बोधन गर्दै उनले बजेट यथास्थितिमा पास हुन नसक्ने बताए ।

‘अहिलेको बजेटमा एकलौटी ढंगले गठबन्धनमा रहेका दलहरुसँग छmलफल नै नगरी यो बजेट ल्याइएको छ । बजेटले मधेश लगायत धेरै क्षेत्रलाई उपेक्षा गरेको छ । त्यसकारण यसलाई सच्याउनु पर्छ, सुधार गर्न पर्छ भनेर हामीले भनेका छौं । यथास्थितिमा यो बजेट पास हुन कठिन छ,’– उनले भने ।

बजेटमा न्यायोचित वितरण नभएको र यसले चालु रहेका योजनासमेतलाई असर पुर्याएको उनको भनाई छ । प्रधानमन्त्री पुष्पकमल दाहाल ‘प्रचण्ड’ समेत बजेट संशोधनका लागि सहमत भइसकेको उनले बताए ।

‘यो बजेटमा न्यायोचित वितरण भएन र देशमा चालु रहेका योजनाहरु समेतलाई अवरोध हुने गरी ल्याइएको छ । प्रधानमन्त्रीजीले पनि यसलाई सच्याउने भन्नु भएको हुनाले सच्चिएर अगाडि बढ्छ,’– उनले भने ।