यस कारण मन्त्रिपरिषद् पुनर्गठनमा भयो अलमल

काठमाडौं – मन्त्रिपरिषद् पुनर्गठनका विषयमा नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल ‘प्रचण्ड’ बीच दैनिकजसो भेटवार्ता भएपनि ठोस नतिजा आउन सकेको छैन ।

लगातारका छलफलमा दुई नेताबीच ठोस सहमति बन्न नसक्दा परिणाम आउन नसकेको र मन्त्रिपरिषद् पुनर्गठनमा पनि ढिलाइ भइरहेको नेताहरुले बताएका छन् ।

अर्कोतिर मन्त्रिपरिषद् पुनर्गठनमा भएको ढिलाइ र नेताहरुको औपचारिक धारणा सार्वजनिक नहुँदा विभिन्न आशंका र अड्कलबाजीहरु भइरहेका छन् । जसले परिस्थिति प्रतिकुल हुने त होइन भन्ने चिन्ता नेकपा नेता कार्यकर्ताहरुमा बढ्न थालेको छ ।

‘गत बिहीबारयता दैनिकजसो छलफलमा जुटेका दुई नेताबीच मंगलबार पनि झण्डै तीन घण्टा छलफल भयो । तर कुनै सहमति भएन । यसले चिन्ता थपिनु स्वभाविक हो’, ओली निकट एक स्थायी समिति सदस्यले भने, ‘मंगलबार पनि सवा १२ बजेदेखि झण्डै ३ बजेसम्म दुई अध्यक्षबीच भेटवार्ता भयो तर कुनै सहमति भएजस्तो लागेन ।’

किन भएन ओली प्रचण्ड सहमति ?

नेकपाका अर्का स्थायी समिति सदस्यका अनुसार मन्त्रिपरिषद् पुनर्गठन गर्ने मापदण्डका विषयमा नै दुई अध्यक्षबीच छलफल जारी छ । स्थायी कमिटी बैठकको म्यान्डेट र सचिवालय बैठकको सुझावका आधारमा मापदण्ड बनाउने विषयमा दुई नेताबीच छलफल भइरहेपनि स्थायी समितिको म्याण्डेटलाई ओलीले बेवास्ता गर्न खोज्दा समस्या देखिएको छ ।

स्रोतका अनुसार ओलीसँगको भेटवार्तामा अध्यक्ष प्रचण्डले स्थायी समितिको म्याण्डेटविपरित गएर मन्त्रिपरिषद् पुनर्गठन गर्न नहुने भन्दै आफ्नो अडान राखेका छन् ।  सोही अनुसार प्रचण्डले ओलीलाई मनाउने प्रयास पनि गरिरहेका छन् । तर ओलीले स्थायी समितिको म्याण्डेटलाई मान्न तयार नहुँदा समस्या भएको हो ।