राष्ट्रपति र प्रधानमन्त्रीबीच भेटवार्ता, अदालतले गलत गरेको निस्कर्ष

काठमाडौँ – प्रधानमन्त्री केपी ओलीले राष्ट्रपति विद्यादेवी भण्डारीलाई भेटेका छन् ।

सर्वोच्च अदालतले प्रतिनिधिसभा विघटन बदर गरेपछि राष्ट्रपति र प्रधानमन्त्रीबीच पहिलोचोटि भेटवार्ता भएको हो । ओली राष्ट्रपति भेट्न बिहीबार राति शतिलनिवास गएको उनको सचिवालयले जनाएको छ ।

राष्ट्रपतिका प्रमुख राजनीतिक सल्लाहकार लालबाबु यादवले राष्ट्रपति र प्रधानमन्त्रीबीच मुलुकको पछिल्लो राजनीतिक अवस्थाबारे छलफल भएको जानकारी दिए ।

भेटमा सर्वोच्च अदालतले आफूहरुको कदम बदर गरेको विषयदेखि संसद बैठक आह्वान, सरकारविरुद्ध संसदमा प्रस्तुत हुने अविश्वास प्रस्तावको सामना कसरी गर्ने लगायत रणनीतिबारे कुराकानी भएको बुझिएको छ । राष्ट्रपति र प्रधानमन्त्रीले सर्वोच्च अदालतले कार्यकारी प्रधानमन्त्रीको निर्णय बदर गर्ने गलत फैसला गरेको समान निस्कर्ष निकालेका छन् ।

प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले गत ५ पुसमा प्रतिनिधिसभा विघटन गरेकी थिइन् । सर्वोच्च अदातलको संवैधानिक इजलासले मंगलबार विघटन बदर गर्दै १३ दिनभित्र संसद बैठक बोलाउन सरकारका नाममा परमादेश जारी गरेको थियो ।