राजीनामा दिने या अविश्वास प्रस्ताव सामना गर्ने निर्णय लिने अधिकार मुख्यमन्त्री पोखरेललाई

काठमाडौं – लुम्बिनी प्रदेश, नेकपा एमाले संसदीय दलको बैठकले अविश्वास प्रस्ताव सामना गर्ने या राजीनामा दिने भन्नेबारे निर्णय गर्ने अधिकार संसदीय दलका नेता तथा मुख्यमन्त्री शंकर पोखरेललाई दिएको छ । केही बेर अघि सम्पन्न एमाले संसदीय दलको बैठकले आवश्यक निर्णय लिने अधिकार मुख्यमन्त्री पोखरेललाई दिएको लुम्बिनी प्रदेशका एमाले प्रमुख सचेतक भूमिश्वर ढकालले बताए ।

उनले संसद्को कार्यव्यवस्था परामर्श समितिको बैठक नै नबोलाइ, विशेष अधिवेशनका सम्बन्धमा दलहरूसँग परामर्श नै नगरी अघि बढ्ने प्रयत्न गरिएकोमा आफूहरूको घोर आपत्ति रहेको जानकारी दिए ।

‘सदन कसरी चलाउने भन्नेबारे कार्यव्यवस्था परामर्श समितिको बैठक राखेर निर्णय गर्ने परम्परा थियो,’ उनले भने, ‘कार्यव्यवस्था परामर्श समितिको बैठक नै नबोलाइ अघि बढ्ने प्रयत्न गरेकोमा हाम्रो घोर आपत्ति छ ।’