आफुमाथि आक्रमण गर्नेको मुद्धा फिर्ता लिने सरकारको निर्णयप्रति उपप्राध्यापक पुगे सर्वोच्च

त्रिभुवन विश्वविद्यालयका उपप्राध्यापक प्रेम चलाउनेले आफुमाथि आक्रमण गरी ज्यान मार्ने उद्योग गरेकाहरुको मुद्दा फिर्ता लिने सरकारको निर्णयविरुद्ध सर्वोच्चमा मुद्दा दायर गरेका छन् ।

सरकारले आफुमाथि आक्रमण गर्नेको मुद्दा गैरकानूनी ढंगले फिर्ता लिएर कानूनी शासनको धज्जी उडाएको भन्दै आज सर्वोचचमा रिट दायर गरेका हुन् ।

विश्वविद्यालय हाताभित्र आफूमाथि मरणासन्न हुनेगरी आक्रमण भएको, त्यो आक्रमणमा संलग्नहरुमाथि मुद्दा चलेको अवस्थामा सरकारले राजनीतिक संरक्षणका आधारमा आरोपितहरुलाई जोगाउन नहुने रिट निवेदनमा उनको दावी छ ।

चलाउनेले दर्ता गराएको रिटमाथि भोलिको लागि पेसी तोकिएको छ ।

समाजशास्त्र विभागका उपप्राध्यापक चलाउनेमाथि २०७७ असोज २० गते नेविसंघका कार्यकर्ताले साङ्घातिक आक्रमण गरेका थिए । त्रिवि नेविसंघ अध्यक्ष हरि आचार्यको समूहले चलाउनेमाथि आक्रमण गरेको थियो ।

अदालतमा मुद्दा बिचाराधीन रहेकै अवस्थामा मन्त्रिपरिषद्ले निर्णय गर्दै आर्चायसहित ५ जनाविरुद्धको मुद्दा फिर्ता लिने निर्णय गरेको थियो ।

काठमाडौं जिल्ला अदालतमा मुद्दा बिचाराधीन रहेकै अवस्थामा सत्ताको दुरुपयोग गर्दै सरकारले मुद्दा फिर्ता लिएको भन्दै चलाउने सर्वोच्च पुगेका हुन् ।