उत्पादन कमी र भारत निर्यात भएको कारण गोलभेडाको मूल्य वृद्धि

उत्पादन कमी र भारत निर्यात भएको कारण गोलभेडाको मूल्य वृद्धि भएकाे छ ।

व्यावसायिहरुले केही समय पहिला नेपालमा उत्पादन उच्च रहेको, भारतमा पनि नगएको र नेपाली बजारमा १० रुपैयाँमा पनि नबिकेको भन्दै सडकमा गोलभेडा फालिएको बताए ।

कालिमाटी फलफूल तथा तरकारी बजारकी गोलभेडा व्यापारी तारादेवी मगरले तरकारीको मूल्यमा उतारचढाव आउनुको कारण उत्पादन भएको बताइन् । उनले अघिल्लो वर्ष एउटा तरकारी धेरै खपत भयो भने अर्को वर्ष सबै किसानले एउटै तरकारी उत्पादन गर्नुको कारणले पनि यस्तो भएको बताइन् । उनले पछिल्लो समय भारतमा बढी पानी परेर डुबान भएको कारण गोलभेडाको मूल्य उच्च रुपमा बढेको बताइन् । एक महिना अघि नेपाली उत्पादन गोलभेडा फालाफाल हुँदा भारतमा समेत गएन तर अहिले नेपाली उत्पादन गोलभेडा करिब ७० प्रतिशत भारतमा गइरहेको उनकाे भनाइ थियाे । नेपाली बजारमा गोलभेडाको कमी भएको अवस्थामा भारतमा गोलभेडा निर्यात गर्दा मूल्य वृद्धि भएको उनले बताइन् । भारत नभएको भए ५० रुपैयाँ किलो भन्दा माथि जाने अवस्था नभएको व्यवसायीकाे भनाइ छ।

अघिल्लो वर्ष यही  समयमा प्रति क्रेट २००० सम्म रहेकोमा अहिले टनेल भन्दा बाहिरको गोलभेडा २ हजार ५०० र टनेलभित्रको २ हजार ८०० प्रति क्रेट मूल्यमा बिक्रि भइरहेको छ । भारतमा समेत २ हजार ८०० प्रति क्रेट गोलभेडा गइरहेको छ भने अहिले नेपाली बजारमा गोलभेडा किलो १४० रुपैयाँ रहेको छ ।