गठबन्धनले देश बनाउने होइन बिगार्ने काम गरेको छ, रास्वपासँग केही छैन : नेता बास्कोटा

नेकपा एमालेका नेता गोकुल बास्कोटाले गठबन्धनले देश बनाउने भन्दा बिगार्ने काम गरेको आरोप लगाएका छन् ।

शुक्रबार एमाले चौरीदेउराली–काठमाडौं सम्पर्क मञ्चको कार्यक्रममा बोल्दै उनले यस्तो आरोप लगाएका हुन् ।

दृष्टिकोण सहितको राजनीतिक स्थिरता र निर्माणको अभियान सञ्चालन गर्ने गठबन्धन नभई एउटा प्रदेशमा १७ जना मन्त्री जन्माउने गठबन्धन भएको भन्दै देश बनाउने होइन देश बिगार्ने काम गरेको नेता बास्कोटाले बताए ।

उनले भने, ‘यो देश बनाउने गठबन्धन होइन । देश बिगार्ने गठबन्धन हो । दृष्टिकोण सहितको राजनीतिक स्थिरता र निर्माणको अभियान सञ्चालन गर्ने गठबन्धन होइन । एउटा प्रदेशमा १७ जना मन्त्री जन्माउने गठबन्धन हो । प्रदेशमा गठबन्धन गर्ने सरकार दिनदिनै मुख्यमन्त्री जन्माउने गर्छ । प्रधानमन्त्री पनि काफी जन्माउँछ । अब अर्कोले मेरो पालो आयो भन्छ अनि सत्ता संकट बढ्छ । यो देश सम्हाल्ने तागत हामीसँग मात्रै छ ।’

उनले नयाँ पार्टी भन्ने राष्ट्रिय स्वतन्त्र पार्टीसँग केही नभएको भन्दै नयाँ भन्नेहरुलाई पुनर्निर्माणको ठेक्का चाहिएको टिप्पणी गरे ।

उनले भने, ‘नयाँसँग पनि केही छैन । देखिसक्या छ, थाह भइसक्यो नि । पुनर्निर्माणको ठेक्का नयाँलाई चाहियो, कति नै इन्जिनियरिङ कला भएजस्तो । केही मतलबको कुरा छैन । देश निर्माणका लागि जनता सबैभन्दा महत्वपूर्ण हुन् ।’

नेता बास्कोटाले चिहानमा पुगिसकेको राजतन्त्र ब्युँताउन असम्भव रहेको पनि बताए ।