सहमती बिना असम्बन्धीत मानिस जम्मा भएर हुलदंगा गर्दा यस्तो घटना घट्यो : ज्यापु समाज

ललितपुर – बिहिबार पुल्चोकमा रातो मच्छिन्द्रनाथको रथ तान्ने क्रममा सर्वसाधरण र प्रहरीबीच झडप भएको छ ।

कोरोना संक्रमितको संख्या ह्वात्तै बढेपछि काठमाडौँ उपत्यकाका प्रमुख जिल्ला अधिकारीहरुले निषेधाज्ञा लागू गरेका छन् । निषेधाज्ञा कै क्रममा सयौँको संख्यामा सर्वसाधरण जम्मा भएर रथ तान्दा प्रहरीले हस्तक्षेप गरेपछि झडप भएको हो ।

गूठी संस्थान र ज्यापु समाजसँग कुनै सरसल्लाह र सहमती बिना असम्बन्धीत व्यक्तिहरु आएर रथ तान्न सुरु गरेपछि यस्तो घटना घटेको ज्यापु समाजका उपाध्यक्ष (चौथो) किरण डंगोलले बताए । यस घटनाले पाटनका नेवाः समुदायको बारेमा गलत धारणा प्रवाह हुनेमा उनले चिन्तासमेत व्यक्त गरे ।

झडपमा प्रहरीले दर्जनौँ शेल अश्रु ग्याँस प्रहार गरेको थियो भने केही व्यक्ति घाइते भएका थिए ।