ओली समूहको उदण्डताः सत्तारुढ सांसदबाटै प्रदेशसभा बैठक अवरुद्ध

विराटनगर – नेकपाको ओली समूहले प्रदेश नम्बर–१ को प्रदेशसभा बैठक अवरुद्ध गरेको छ ।

सत्तापक्षले नै संसदमा अवरोध गरेपछि विपक्षी रिसाएका छन् । मुख्यमन्त्री शेरधन राईविरुद्ध अविश्वास प्रस्ताव दर्ता हुन नदिन सत्ता पक्षले संसद बैठक अवरुद्ध गरेको हो । बैठक सुरु हुनासाथ ओली समूहका सांसद उठेर नाराबाजीमा उत्रिएका थिए ।

अवरोधको स्थितिमा संसदको कारबाही अगाडि बढ्न नसक्ने भन्द्र सभामुख प्रदीपकुमार भण्डारीले बैठक स्थगनको घोषणा गरे । अर्को बैठक आगामी ९ फागुनमा बस्ने गरी भण्डारीले आइतबारको बैठक स्थगन गरिएको बताए ।

बैठक अवरुद्ध गरिएपछि अविश्वास प्रस्ताव दर्ता हुन सकेन । नेकपाको प्रचण्ड–नेपला समूहले राईविरुद्ध अविश्वास प्रस्ताव पेश गर्ने निर्णय यसअघि नै गरिसकेको छ ।