ट्राफिक चेकिङ छलेर भाग्न खोज्दा स्कुटर चालक युवतीलाई बसले किच्यो

ललितपुर – ललितपुरको जावलाखेलमा सोमबार बसले किच्दा  स्कुटर चालकको ज्यान गएको छ ।

प्र ३–०२–०१०प५५८९ नम्बरको स्कुटर चालक उदयपुर घर भइ हाल ललितपुर बस्ने २३ वर्षीया सिर्जना राईको मृत्यु भएको हो । उनलाई बा  २ ख ३५७४ नम्बरको बसले किचेको थियो । गम्भीर घाइते राईको अल्का अस्पतालमा उपचारका क्रममा मृत्यु भएको हो ।

प्रहरी चेकिङबाट बच्न स्कुटर भगाउन खोज्दा अनियन्त्रित भई स्कुटर पल्टिएको र पछाडिबाट आउँदै गरेको बसको चक्काले राईलाई किचेको प्रहरीले जनाएको छ । तर, प्रत्यक्षदर्शी र मृतकका आफन्तले भने राई भाग्न खोज्दा ट्राफिक प्रहरीले पछाडिबाट स्कुटर तानेको र सोही क्रममा राई लडेको बताएका छन् ।

महानगरीय प्रहरी परिसर ललितपुरकी प्रमुख एसएसपी किरण बज्राचार्यले सवारी चालक अनुमतिपत्र नभएका कारण ट्राफिक चेकिङबाट जोगिन हतास भएर भागेकी राईको स्कुटर अनियन्त्रित भएर पल्टिएको बताइन् । यसैबीच प्रहरीले ठक्कर दिने बस र चालकलाई नियन्त्रणमा लिएको छ ।