बिरामी प्रधानमन्त्रीले महन्थ ठाकुरलाई किन बोलाए बालुवाटार ?

काठमाडौँ, ११ कात्तिक– प्रधानमन्त्री तथा नेपाल कम्युनिस्ट पार्टी नेकपाका अध्यक्ष केपी शर्मा ओलीले संविधान संशोधनको विषयमा राष्ट्रिय जनता पार्टी अध्यक्ष मण्डलका संयोजक महन्थ ठाकुरसँग आइतबार (आज) भेटवार्ता गर्ने भएका छन् ।

राजपा स्रोतका अनुसार, प्रधानमन्त्री ओलीले संयोजक ठाकुरसँग समसामयिक राजनीतिक अवस्था र संविधान संशोधनका विषयमा छलफल गर्नेछन् । राजपालाई सरकारमा ल्याउने विषयमा पनि भेटका क्रममा छलफल हुने बताइएको छ ।  राजपाले संविधान संशोधन र फौजदारी अभियोग लगाइएका निर्वाचित सांसद रेशम चौधरीलाई सपथ गराउनुपर्ने माग पूरा नभएसम्म सरकारमा सहभागी नहुने बताउँदै आएको छ । अस्वस्थताका कारण शनिबार नेकपाले मुख्य चाड पर्वको सन्दर्भ पारेर आयोजना गरेको चियापानमा सहभागी हुन नसकेका प्रधानमन्त्रीले ठाकुरलाई सरकारी निवास बालुवाटारमै भेट्दैछन् ।