डाक्टरहरुको परीक्षामा प्रति व्यक्ति ८० लाख रुपैयाँको चलखेल, नक्कली विद्यार्थी परिक्षामा

काठमाडौँ – चिकित्सा शिक्षा आयोगको स्नातकोत्तर तह (पीजी) प्रवेश परीक्षामा हुने चलखेल बाहिरिएको छ । करिब ५० जना नक्कली परीक्षार्थीको फोटो मिलाएर फारम भरेको प्रमाण फेला परेको छ ।

आयोगले प्रवेश परीक्षामा कुनै पनि बायोमेट्रिक नराखेको फाइदा बिचौलियाले बिगतमा पनि उठाइरहेको भन्ने कुरा बाहिरिए पनि यस पटक भने आधारहरु फेला परेको हो । परीक्षर्थीहरुसँग मोटो रकम असुल गरेर बिचौलियाले नक्कली परीक्षार्थीलाई परीक्षामा सामेल गराउन लागेको हो ।

शनिबार पीजीको परीक्षा संचालन हुँदै छ । शनिबार हुने पिजीको परीक्षाको प्रश्नपत्र बाहिरिएको पनि परीक्षार्थीहरु बताउँछन् । बिचौलियाले नक्कली परीक्षार्थीलाई प्रश्नपत्र अनुसारको उत्तरहरु घोकाइरहेको र सेटिङ्ग अनुसार रकम तिर्ने बिद्यार्थीको ठाउमा तिनै नक्कली परीक्षार्थीलाई सामेल गराउने स्रोतले बतायो ।

पाटन स्वास्थ्य विज्ञान प्रतिष्ठानका प्राध्यापकका छोरा मार्फत विभिन्न समुहसम्म प्रश्नपत्र पुगेको पनि स्रोतले जानकारी दिएको छ । १२ जना भारतीय र २४ जना नेपाली विद्यार्थीहरुलाई विभिन्न होटल तथा रिसोर्टमा राखेर प्रश्नपत्र अनुसारको उत्तर घोकाइरहेका छन् ।

नक्कली परीक्षार्थी मार्फत परीक्षा दिलाउने खेल भइरहेको भन्दै चिकित्सा शिक्षा आयोगमा विद्यार्थीले उजुरी दिए पनि परीक्षा स्थगित नहुने भएको छ । सो विषयमा आयोगले अनुसन्धान गरिरहेको आयोगले विज्ञप्ति जारी गरेको छ ।

बिचौलियासँगको वार्तालाप हेर्दा ८० लाख रुपैयासम्मको रकम बार्गेन भएको पाइएको छ । चिकित्सा क्षेत्रमा बेलाबखत हुने गरेका लापर्वाहीको पछाडी यसैगरी पैसाको चलखेलमा उत्तिर्ण हुने विद्यार्थीहरु त होइनन् भन्ने आशंका उत्पन्न भएको छ । चिकित्सा जस्तो गम्भिर क्षेत्रमा पनि हुने यस किसिमका बेथिती र बिचौलियाको हालीमुहालीले समग्र नेपालको चिकित्सा सेवाको गुणस्तर खस्किने पक्का छ ।