सफाई अभियान्ता तथा वातावरणविद प्रकाश अमात्यको निधन

सफाई अभियान्ता तथा वातावरणविद प्रकाश अमात्यको निधन भएको छ । शुक्रबार साझ करिब ८ बजेको समयमा अमात्यको ललितपुर स्थित मेडिसिटी अस्पतालमा हृदयघातका कारण निधन भएको हो ।

अमात्यले सञ्चालन गरेको एरोशान हबका अत्याधुनिक शौचालय हाल निकै चर्चामा रहेका छन् । काठमाडौँ र ललितपुर महानगरपालिकासँगको सहकार्यमा एरोशान हबले अत्याधुनिक नमुना शौचालयहरुको निर्माण तथा संचालन गरिरहेको छ । अमात्य वातावरण तथा सरसफाईको क्षेत्रमा निकै परिचित नाम हो ।

एरोशान हबले स्वयम्भुमा संचालन गरेको सार्वजनिक शौचालय विश्व कै उत्कृष्ट ५ शौचालयमा पर्न सफल भएको थियो ।

एरोशान हबका कार्यकारी निर्देशक रहेका अमात्यको गुठि, एन्फो लगायतका सामाजिक संघ-संस्थामा पनि अवद्धता रहेको थियो । परिवार श्रोतका अनुसार अमात्यको अन्तिम संस्कार शनिबार बिहान ७ बजे पशुपति आर्यघाटमा गरिने छ ।