नक्कली भुटानी शरणार्थी प्रकरणमा अन्तिम रिपोर्ट हेर्न म भन्दा आतुर कोही छैनः आरजु

नेपाली कांग्रेसको केन्द्रीय सदस्य तथा पूर्वप्रधानमन्त्री तथा कांग्रेस सभापति शेरबहादुर देउवाकी श्रीमती आरजु राणा देउवाले नक्कली भुटानी शरणार्थी प्रकरणको अन्तिम रिपोर्ट हेर्न आफूजति आतुर कोहि नभएको बताएकी छिन् । सोमबार प्रतिनिधि सभाको बैठकमा बोल्दै उनले यस्तो बताएकी हुन् ।

उनले भनिन्, ‘नक्कली भुटानी शरणार्थी प्रकरणमा को दोषी हो, को होइन प्रष्टसँग आओस त्यसको सत्यतथ्य चाँडै नै उजागर गर्न माग गर्दछु । यो केसको अन्तिम रिपोर्टका लागि म भन्दा आतुर कोही छैन ।’

नेपाली नागरिकलाई नक्कली भुटानी शरणार्थी बनाएर अमेरिका लैजाने प्ररणमा को–को दोषी हुन् भन्नेबारे चाँडो छानबिन हुनुपर्ने समेत उनले माग राखिन् । साथै उनले फेक अडियो बनाएर आफूलाई बदनाम गरिएको समेत बताईन् ।

उक्त अडियोको फरेन्सिक जाँच गर्न ६ दिनअघि नै नेपाल प्रहरीको केन्द्रीय अनुसन्धान ब्यूरो र साइबर क्राइम सेलमा निवेदन दिए पनि अहिलेसम्म जवाफ नपाएको आरजुले गुनासो गरिन् । उनले भनिन्, ‘फेक अडियो मेरो मात्र होइन, अरुको पनि बनेको छ, नाम मेरो मात्र उच्चारण किन भइरहेको छ ? साँच्चै भन्ने हो यो क्यारेक्ट असासिनेसन होइन, दिस इज रेप अफ माइ क्यारेक्टर हो ।’