विवेकशील साझा पार्टीकी महासचिव रञ्जु दर्शनालाई पढाउन रहर लागेपछि …

विवेकशील साझा पार्टीकी महासचिव रञ्जु दर्शनालाई पढाउन रहर लागेपछि उनले फेसबुकमा एउटा पोस्ट गर्दै आफूलाई अवसर दिन आग्रह गरेकी छन् । उनले कक्षा ११ र १२ मा पढाउने योजनासहित जागिरको खोजी सुरु गरेकी हुन् ।

रञ्जुले फेसबुकमा पोस्ट गरेकाे स्ट्याटस अनुसार अध्यापन आफ्नो एउटा प्यासनको क्षेत्र रहेको उल्लेख गरेकी छन् ।

उनी लेख्छिन्, ‘हाइस्कुलका लागि नयाँ सेसन सुरु हुन गइरहँदा मैले अन्ततः आफ्नो एउटा रुचिको बाटोमा हिँड्ने निर्णय लिएकी छु, जुन भनेको विद्यार्थीहरुसँग घुलमिल हुने, उनीहरुबाट सिक्ने र उनीहरुको शिक्षामा मार्गदर्शन गर्ने हो । म कक्षा ११ र १२ का विद्यार्थीका लागि सामाजिक शिक्षा विषय अध्यापन गर्न खोजिरहेको छु ।’

रञ्जुले यदि कसैको संगठनभित्र यस्तो अवसर र स्थान भएको खण्डमा आफूलाई सम्पर्क गर्न भनेकी छन् । उनले आफू सामाजिक विज्ञानसँग सम्बन्धित विषयहरुमा गेष्ट लेक्चरका लागि समेत खुल्ला रहेको जानकारी गराएकी छन् ।

रञ्जुले राजनीति नै छोडेर अध्यापनमा लाग्ने मनस्थिति बनाएकी भने होइनन् । राजनीतिलाई पनि सँगसँगै लैजाने उनको भनाइ छ । उनी केही महिना अगाडि मात्रै विवेकशील साझाको महासचिव निर्वाचित भएकी थिइन् ।