एमाले ललितपुरको अध्यक्षमा पुरुषोत्तम आचार्य निर्वाचित

नेकपा (एमाले) ललितपुरको नवौं जिल्ला अधिवेशनबाट पुरुषोत्तम आचार्य अध्यक्षमा निर्वाचित भएका छन् । ललितपुरको महालक्ष्मी नगरपालिकामा सम्पन्न अधिवेशनबाट २ सय २९ मत प्राप्त गरी आचार्य अध्यक्षमा निर्वाचित भएका हुन् ।

अध्यक्षका अन्य तीन जना प्रतिस्पर्धीहरुमध्ये चेतनाथ संजेलले १ सय ५४ मत, दिनेश कार्कीले ८१ मत र सुवर्ण श्रेष्ठले ९ मत प्राप्त गरेका थिए । चैत्र २३ गते देखि सुरु भएको अधिवेशनमा नेतृत्व चयनमा सहमतिको अधिकतम प्रयास सफल नभएपछि आज निर्वाचन भएको हो । अधिवेशनबाट १ सय २० सदस्यीय जिल्ला कमिटी चयन भएको निर्वाचन समितिले जानकारी दिएको छ ।

ललितपुर जिल्ला कमिटीको उपाध्यक्षमा ललितपुर महानगरकी उप प्रमुखसमेत रहेकी मन्जली शाक्य (आस्था) निर्वाचित भएकी छिन् । सचिवमा राम राउत निर्वाचित भएका छन् भने सहसचिवमा प्रभाकर थापा र आशा राई निर्वाचित भएको निर्वाचन समितिले जनाएको छ ।

अधिवेशनमा ४ सय ७८ प्रतिनिधि रहेकामा ४ सय ७३ मत खसेको थियो ।