नेपालमा ठूलो संख्यामा भारतीय धार्मिक पर्यटक भित्र्याउन सकिने संभावना छ : मन्त्री तामाङ

चितवन । संस्कृति, पर्यटन तथा नागरिक उड्ययन मन्त्री हित बहादुर तामाङले नेपाल धार्मिक, सांस्कृतिक, पुरातात्वीक सम्पदाहरुका हिशाबले असाध्य धनी रहेको र खास गरी हिन्दु बाहुल्य देश भएको हुनाले ठूलो संख्यामा भारतीय धार्मिक पर्यटक भित्र्याउन सकिने संभावना रहेको बताउनु भएको छ ।

चितवनको देवघाटधाम संरक्षण प्रतिष्ठानले निर्माण गर्न लागेको अष्टधातु शिवमुर्तिको शिलन्यास गर्दै मन्त्री तामाङले सो कुरा बताउनु भएको हो ।

उहाँले नेपालमा हवाई मार्गबाट मात्र नभएर स्थलमार्गबाट पनि लाखौँको संख्यामा धार्मिक पर्यटक ल्याउन सकिने बताउनु भयो ।

अष्टधातु शिवमुर्ति निर्माणका लागि प्रधानमन्त्रीसँगको सल्लाहमा बजेट व्यवस्था गरिएको जानकारी दिँदै देशको विकास र समृद्धिको एउटा आधार पर्यटन भएकाले त्यसमा धार्मिक पर्यटनको पनि भूमिका हुने उल्लेख गर्नु भयो ।

उहाँले राज्य धर्मनिरपेक्ष भएकाले सबै धर्मलाई समान रुपले हेर्ने भन्दै नेपालमा सबै खाले धार्मिक पर्यटक आउने गरेको उल्लेख गर्नु भयो ।

उहाँले यो बजेट योजना अनुसार कुनै समस्या नआउने गरी कार्यन्वयन गर्न आग्रह गर्नु भयो । उहाँले मन्त्रालयको तर्फबाट सहयोग गर्ने प्रतिवद्धता पनि जनाउनु भयो ।