निर्मम कुटिइदासमेत सहानुभूति नपाउने अवस्थामा पुगिसके युट्युबर, अब त सुध्रिने की ?

मंगलबार समाजिक सञ्जालमा एकाएक एक भिडियो भाइरल भयो – युट्युबरलाई मेनपावर सञ्चालक र दलालहरुले कुटेको भिडियो ।

काठमाडौँको सामाखुसीमा अवस्थित ट्रिपल स्टार मेनपावरमा गएका युट्युबरलाई मेनपावर सञ्चालक र मेनपावर समर्थक युवाहरु मिलेर निर्मम कुटपिट गरे । मेनपावरबाट पीडित भएकाहरुको साथमा युट्युबरहरु सामाखुसी स्थित मेनपावर पुगेका थिए । स्पष्ट रहस्य भने खुलिसकेको छैन, तर पीडितहरुको साथ लागेर युट्युबरहरु मेनपावर पुगेको स्पष्ट छ । जब पीडितको साथ दिन पुगेका युट्युबर कुटिएको भिडियो सामाजिक सञ्जालमा भाइरल भयो, युट्युबर प्रति सहानुभूती दर्शाउने बिरलै देख्न पाइए । धेरै त यस घटनाले युट्युबरलाई ठूलो पाठ सिकाएको भन्दै खुसी व्यक्त गरिरहेका थिए ।

पछिल्लो समय प्रविधिले मारेको फड्कोले अनलाईन माध्यम हरेक क्षेत्रमा प्रभावकारी बनिरहेको छ । सूचना तथा सञ्चार क्षेत्रमा त झन् यसले आमूल परिवर्तन ल्याएको छ । यसै प्रविधिको फड्कोसँगै नेपालमा पनि अनलाइन मिडियाको संख्या उसै गरी बढिरहेको छ । मिडियाको संख्या बढ्नु निकै सुखद पक्ष रहे पनि यससँगै बिकृति पनि उसै गरी बढिरहयो । युट्युबमार्फत पत्रकारिताको स्वरुप जस्तै देखिने तर अलपत्रकारिता गर्ने एक झुण्ड सक्रिय रहिरहयो, जसले आम बुझाइमा पत्रकारिता नै यस्तै रहेको भन्ने बुझाई केही हदसम्म स्थापित गराइदियो ।

युट्युब प्लेटफर्म समातेर पत्रकारिता गर्ने सम्पूर्ण पत्रकारलाई नै यो एक झुण्डले बदनाम गराइराख्यो । पत्रकारिताको न्युनतम मूल्य मान्यता र न्युनतम योग्यतासमेत नभएकाहरु आम जनताका माझ पत्रकार कहलिए । श्रीमान–श्रीमतीको गोप्य कुरा, पीडितलाई झन् पीडा दिने सामग्रीसमेत युट्युबमा भेटिन थाले । यसले बिस्तारै युट्युब प्लेटर्फममार्फत पत्रकारिता गरिरहेका सम्पूर्णलाई ‘युट्युबे’ को ट्याग भिर्याइदियो ।

त्यसैले त पीडित कै पक्षमा आवाज उठाउन गइदिएका युट्युबर माथि निर्घात कुटपिट भयो, सहानुभूतिको साटो ‘खुचिङ्ग’ आयो । अति सोझा व्यक्तिलाई पनि थाह छ कि मेनपावरले यस्तै अवस्थाका लागि पेशेवर गुण्डा पालेका हुन्छन् । यसै घटनाले पनि सो कुरा पुष्टि गरेको छ । अधिकांश मेनपावरवालाहरुको कतुर्त बारे सबै नेपाली जानकार नै छौँ तर पनि जनता खनिए युट्युबर माथि ।

पत्रकारिता गर्न न्युनतम पत्रकारिताको मूल्य मान्यता त पालना गरौँ, शैली र प्रस्तुतीको अध्ययन त गरौँ, गोपनीयताको सम्मान त गरौँ । अब पनि सुधार आएन भने संभवत गाउ गाउबाट जनताले युट्युबमार्फत अलपत्रकारिता गर्नेहरुलाई यसै गरी खेदाउने छन् , दलाल भ्रष्ट अनि गुण्डाले टुँडिखेलमै अलपत्रकारिता गर्नेहरुलाई यसै गरी कुट्ने छन् अनि जनताले गड्गडाहत ताली पिट्ने छन् । अलपत्रकारिता गर्नेहरुको घानमा पत्रकारिता गर्नेहरु पनि मुछिने छन् जसले देशलाई ठूलो घाटा हुनेछ । नारायणहीटि हुरी बतासले कब्जा गर्छन् , ओम्नीले त्यसै गरी घोटाला गरिरहन्छ, वाइड बडीमा करोडौँ अनियमितता हुदा जनता बेखबर रहिरहने छन् ।

युट्युबमार्फत सिर्जित यो अवस्था निकै जटिल अवस्थामा पुगिसकेको छ । पत्रकारिता बारेको बुझाई आम मानिसमा निकै नकारात्मक रुपमा छाप बसिसकेको छ । अब पनि सुध्रिएनौ भने निकै ढिलो भइसक्ने छ ।