अन्तरजातीय प्रेम विवाह गर्दा माइतीपक्षको धम्की !

सर्लाही– अन्तर्जातीय विवाह गरेको भन्दै सर्लाहीमा बेहुलाको आमालाई स्थानीय तहका जनप्रतिनिधिले दुर्व्यवहार गरेको आरोप लागेको छ ।

सर्लाहीको बरहथवा नगरपालिका वडा नम्बर १७ बस्ने जितेन्द्र राम र अञ्जु रायले अन्तरजातिय विवाह गरेपछि जितेन्द्रकी आमा धनेश्वरीदेवीलाई वडाध्यक्ष रामविश्वास रायले हातपात गर्दै दुर्व्यवहार गरेको आरोप लागेको हो ।

गैरदलित युवतीसँग अन्तरजातीय विवाह गरेको भन्दै वडाअध्यक्ष र अञ्जुको बाबु अभिनन्दन रायसमेतले आफूलाई अनेक धम्कीसहित दुर्व्यवहार गरेको धनेश्वरीदेवीले गुनासो गरिन् ।

प्रेमपछि भागेर अन्तर्जातीय बिहे गरेका जितेन्द्र  र अन्जु कक्षा ११ मा अध्ययनरत थिए । माइती पक्षको दवावपछि जितेन्द्र र अन्जु अहिले घरबाहिर नै लुकीछिपी बस्दै आएको बताइएको छ ।

यसैबीच घटनापछि पीडित धनेश्वरीदेवीले प्रहरीमा उजुरी दिएकी छिन् ।
उनको निवेदन दिएपछि प्रहरीले सुरक्षाको लागि प्रबन्ध मिलाएको र घटना बारे अनुसन्धान भइरहेको प्रहरी उपरिक्षक गोपालचन्द्र भट्टराईले जानकारी दिए ।