सुपर ओभरमा दिल्लीको भाग्य !

नेपालका लेग स्पिनर सन्दीप लामिछाने रहेको दिल्ली क्यापिटल्सले इन्डियन प्रिमियर लिग (आइपीएल) क्रिकेटमा दोस्रो जित हात पारेको छ । शनिबार राति भएको खेलमा दिल्लीले कोलकत्ता नाइट राइडर्सलाई सुपर ओभरमा हरायो

दिल्लीस्थित फिरोज कोट्ला स्टेडियममा कोलकत्ताले दिएको एक सय ८६ रनको लक्ष्य पछ्याएको दिल्लीले निर्धाीरत २० ओभरमा ६ विकेटको क्षतिमा एक सय ८५ रन बनाएपछि खेल सुपर ओभरमा गएको थियो ।

सुपर ओभरमा दिल्लीले एक विकेट गुमाएर १० रन जोड्दै कोलकत्तालाई ११ रनको लक्ष्य दिएको थियो । दिल्लीका ऋषब पन्तले ६ रन  बनाए । जवाफमा कोलकत्ताले एक विकेटको क्षतिमा ६ रन मात्र बनाउन सक्यो । कोलकत्ताका आन्द्रे रसेलले चार रन बनाएका थिए ।

सुपर ओभरमा जानुअघि दिल्लीका युवा ब्याट्सम्यान पृथ्वी शले अर्धशतकीय इनिङ खेलेका थिए । सतक बनाउन मात्र एक रनले चुकेका पृथ्वीले  ५५ बलमा ९९ रन जोडेका थिए । कप्तान श्रेयस आयरले ४३ र शिखर धवनले १६ रन बनाउ । बलिङमा कोलकत्ताका कुलदीप यादबले दुई विकेट लिए । लोक्की फेर्गुसन, आन्द्रे रसेल र पियुस चावलाले एक एक विकेट लिएका थिए ।

यसअघि टस हारेर पहिले ब्याटिङ गरेको कोलकत्ताले निर्धारित २० ओभरमा आड विकेटको क्षतिमा एक सय ८५ रन बनाएको थियो  । कोलकत्ताका लागि आन्द्रे रसेल र कप्तान दिनेश कार्तिकले अर्धसतकीय इनिङ खेले । रसेलले ६२ र दिनेशले ५० रन बनाए । क्रिस ल्यानले २०, पियुस चावलाले अविजित १२, रोबिन उथप्पाले ११ र कुलदीप यादबले अविजित १० रन बनाएका थिए । बलिङमा दिल्लीका हर्सल पटेलले दुई विकेट झारे ।  नेपालका सन्दीप लामिछाने, अमित मिश्रा, कागिसो राबडा र क्रिस मोरिसले एक एक विकेट लिएका थिए ।

नेपालका सन्दीपले कोलकत्ताविरुद्ध उत्कृष्ट प्रदर्शन गर्दै चार ओभरमा २९ रन खर्चिएर एक विकेट लिएका थिए । यस खेलको प्रदर्शनले सन्दीप आगामी खेलमा पनि टोलीका अट्ने सम्भावना बढेको छ । जितसँगै दिल्लीले तीन खेलबाट चार अंक जोडेको छ । दिल्ली लिगको दोस्रो स्थानमा रहेको छ । पहिलो हार खेपेको कोलकत्ता चार अंक सहित लिगको शीर्ष स्थानमा छ ।