काँग्रेसको जागरण अभियान : सुरु नहुँदै पार्टीभित्र ‘ज्वरो’ !

नेपाली काँग्रेसमा राष्ट्रिय जागरण अभियानको विषयलाई लिएर विवाद देखिएको छ । संस्थापन पक्षले सघन छलफल बेगर आफूखुसी राष्ट्रिय जागरण अभियान सञ्चालनको घोषणा गरेको भन्दै संस्थापनइतर पक्षले असन्तुष्टि जनाएको हो । पार्टीका वरिष्ठ नेता रामचन्द्र पौडेलले आफूसँग खासै छलफल नै नगरी अभियान घोषणा गरेको आरोप लगाएका हुन् ।

पौडेलले भने, ‘शेरबहादुर देउवाजीले यति ठूलो निर्णय पनि गुटगत ढङ्गले नियर्ण गर्नुभयो । कुनै छलफल आवश्यक ठान्नु भएन । जागरण अभियानबारे प्रवक्ता विश्वप्रकाशले एकचोटि सामान्य जानकारी मात्र गराएका थिए । केन्द्रीय कार्यसमिति नै बोलाएर यसबारे सरसल्लाह र छलफल गरेको भए राम्रै हुन्थ्यो । त्यो देखिएन ।’

उनले जागरण घोषणाका साथै विभिन्न जिल्लामा केन्द्रीय प्रतिनिधि खटाउँदा पनि आफूखुसी नियर्ण भएको आरोप लगाए ।

‘उहाँहरूले एक पक्षीय तवरबाट जागरण अभियान घोषणा गर्नुभयो । फेरि एकपक्षीय रूपमै एक महिना लामो अभियानका लागि केन्द्रीय सदस्यहरूलाई आफूखुसी जिल्लामा खटाइयो । यस्तो तरिकाले अभियान कति प्रभावकारी हुन्छ ?,’ वरिष्ठ नेता पौडेलले प्रश्न मिश्रित असन्तुष्टि पोखे ।

जागरण अभियानको औचित्यमाथि नै प्रश्न उठाउनुभयो भन्दा उनले भने, ‘यसो नगरेको भए हुन्थ्यो मात्र भनेको पो त, कहाँ औचित्यमाथि प्रश्न गरेको हो र ? वैशाख २५ गतेबाट अभियान प्रारम्भ हुँदैछ । सबै तयारी पनि गरिसक्नुभएको छ । अरू धेरै कुरा गरेर के फाइदा ।’