एक घर एक रक्तदाता अभियान, लकडाउनको समयमा रगतको अभाव सामान्य बनाउने प्रयास !

काठमाडौँ – कोरोना भाईरस (कोभिड १९)का कारण लकडाउनको अवस्थामा रगतको अभाव हुन नदिन नेपाल रेडक्रस सोसाईटी महाबौद्ध उपशाखा र काठमाडौँ जिल्ला शाखाले संयुक्त रूपमा “एक घर एक रक्तदाता” अभियान शुरू गरेको तेस्रो हप्तामा प्रवेश गरेको छ ।

यस अभियान अन्तर्गत नेपाल रेडक्रस सोसाईटी महाबौद्ध उपशाखाको संयोजनमा थानकोट चन्द्रागीरी निवासी ऋतु कुमार श्रेष्ठ, मुक्ति श्रेष्ठ र बेन्जु श्रेष्ठको अगुवाईमा भक्तपुर रक्त संचार केन्द्र (ब्लड बैंक) मार्फत मिति ७ बैशाख रगत संकलन गरिएको छ। चन्द्रागीरी नगरपालिका वडा नं ३ अन्तर्गत थानकोट क्षेत्रका २० जना स्थानीयले रक्तदान गरेका छन् ।

‘लकडाउनको समयमा रगतको अभाव भएको फेशबुकमार्फत जानकारी पाएकोले साथीहरुलाई रक्तदानको लागि अपिल गरेको रितुकुमार श्रेष्ठले बताए । ‘घरघरमा आएर रगतको संकलन गरिने जानकारी प्राप्त भएपछि आफ्नै घरमा रेडक्रस सोसाइटीका सहकर्मीहरुलाई बोलाएर यो रक्तदान कार्यक्रम गरेको पनि उनले जानकारी दिए ।

सो अपिललाई सहर्ष स्वीकार्दै स्थानीयले घरदैलो मै रक्तदान गरेका हुन् । ’पहिलो पटक सामाजिक कार्य गर्न पाएकोमा आफु ज्यादै खुसी भएको र यस्तो महामारीको अवस्थामा रगतको अभावले थप कसैको ज्यान गुमाउनु नपरोस् भन्ने उदेश्यसहित कार्यक्रमको अयोजना गरेको हो ।’ श्रेष्ठले स्पस्ट पारे ।

यस्तो लकडाउनको समयलाई चुनौतीको रुपमा सामना गरेर रक्तदान कार्यक्रम गर्दा व्यक्तिगत सुरक्षाको सबै साधन अपनाइ सावधानिक रुपमा रक्तदान सम्पन्न गरेको महाबौद्ध उपशाखाका सभापति योगेश कुमार शाहीले बताए। प्रत्येक घरपरिवारवाट एक जनाको दरले नियमित रगत दान गर्ने हो भने हालको अभाव सामान्य हुनेछ ।

“एक घर एक रक्तदाता” अभियानले महामारीको अवस्थामापनि व्यापकता लिएको देखिन्छ।” उपशाखाका सचिव प्रकाश अमात्यले जानकारी दिनु हुन्छ । “सामाजिक दुरी कायम गरी संक्रमणको सुरक्षा व्यवस्थापन कायम गरी घर दैलोमा रगत संकलन गरिने भएको हुँदा यसले रक्त संकलन र संचारमा नौलो अभ्यासको थालनी गर्ने छ ।” अमात्य उत्साहित देखिन्छन् तर यसलाई निरन्तरता दिन उत्तिकै चुनौतिपुर्ण रहेको औंल्याउँदै प्रत्येक रक्तदातालाई तीन तीन महिनामा नियमित रक्तदान गराउन प्रोत्साहन गराईने रणनिति भएको बनाउने बताए ।

पछिल्लो समय रक्तदाता घरघरमै सीमित भएकोले स्वास्थ्य क्षेत्रमा रगतको अभाव चुलिएको छ । त्यसैले पनि रेडक्रसले घरदैलो रगत संकलन अभियानलाई तीव्र बनाएको छ । यस अभियान २१ चैत्र शुक्रवार देखि संचालनमा आएको हो र सामुहिक प्रयासबाट हाल भक्तपुर ब्लड बैकमा १००० युनिट रगत मौजात रहेको जानकारी रक्त संचार केन्द्रका प्राविधिक दामोदर नकर्मीले दिए । अवको दिनमा दिनहुँ २०० युनिट रगत संकलन भैदियो भने उपत्यकामा रगत अभाव हुने छैन ।

औषधि सेवन गरेका, महिनावारी भएको वेला, सुगर- प्रेसरका विरामीहरूले भने रक्तदान गर्न मिल्दैन ।