भारतमा आजबाट पहिलो चरणको लकडाउन खुल्यो

भारतमा आजबाट लकडाउन खुलेको छ । भारत सरकारले अनलक नाम दिएर आजबाट लागु हुने गरी तीन चरणमा लकडाउन खुल्ने निर्णय लिएको हो । कोरोना भाइरससबाट डेढ लाखभन्दा बढी संक्रमित भइसकेपनि भारतले लकडाउन खोलेको हो ।

अनलक एक अबको १ देखि ३० जुनसम्म हुनेछ । जसमा रातको कफर्यु कायमै रहनेछ । कफर्यु समय साँझ ७ देखि विहान ७ बजेको ठाउँमा अब साँझ ९ देखि विहान ५ बजेसम्म मात्र रहनेछ ।

पहिलो चरणमा ८ जुनबाट धार्मिक स्थलहरु खुल्नेछन् । जसमा मन्दिर, मस्जिद र चर्चहरु खुल्ने भएका हुन् । धार्मिक संस्था आजबाट नै खोल्ने माग समेत भएको छ । होटल, रेष्टुरेन्ट, सेवाका क्षेत्र, सपिङ मल र सुपरमार्केटहरु खोल्ने अनुमति दिइएको छ । तर, उनीहरुले सावधानी अपनाउनु पर्नेछ ।

लकडाउन खुलेपछि अनलकको दोस्रो चरणमा स्कुल, कलेजलगायतका शैक्षिक संस्थाहरु खुल्नेछन् । शैक्षिक संस्थाको सवालमा राज्य सरकारहरुसँग परामर्श गरिने जनाइएको छ । कतिपय राज्यहरुमा १३ जुनबाट विद्यालय खुल्ने भनिएको छ । जुलाईमा भने सबै राज्यहरुमा विद्यालय खुल्ने निर्णय लिइने भएको छ । तीन महिनापछि विद्यार्थीहरु विद्यालय जानेछन् ।

तेस्रो चरणमा अन्तर्राष्ट्रिय हवाई यात्रा, मेट्रो रेल, सिनेमा हल, पौडी पोखरी, मनोरञ्जन पार्क, थिएटर, बार, एसेम्ब्ली हल खोल्न दिइनेछ । यसका लागि निश्चित नियम बनाइनेछ ।

भारतमा लकडाउन खुलेको छ । नेपालमा ३२ जेठसम्म लकडाउन लम्ब्याइएको छ । भारतमा लकडाउन खुलेको अवस्थामा नेपालमा कस्तो निर्णय लिइएला भन्ने चासो बढेको छ । सरकारले विभिन्न क्षेत्रमा खुकुलो बनाउँदै लाने नीति लिन लागेको छ । एजेन्सी