थाइल्याण्डमा अप्ठ्यारोमा परेका नेपालीलाई थाइ नेपाली संघको राहत

रन्जना सितिखु, काठमाडौँ – थाइ नेपाली संघ, दुःख निवारण विभागको अग्रसरतामा थाइल्याण्डका विभिन्न शहरहरूमा कोरोना भाईरसका कारण अप्ठ्यारोमा परेका नेपाली र गोर्खाली एवं जनजाती समुदायमा राहत वितरण गरिएको छ । थाइ नेपाली संघका विभिन्न शाखाहरुले सक्रियताका साथ राहत संकलन साथै वितरण कार्य गरेका छन् । कोभिड १९ का कारण नियमित काम नभएपछि आर्थिक रुपले अप्ठ्यारोमा परेका समुदायलाई संघद्वारा राहत वितरण गरिएको छ ।

राहत सामग्रीहरुमा चामल, तेल, चाउचाउ, माछाका डब्बा, पिठो, नुन, मसला जस्ता दैनिक उपभोग्य सामग्रीहरु थिए । आवश्यकता अनुसार केही व्यक्तिहरुलाई आर्थिक सहयोग पनि गरिएको थियो । शाखाहरू नभएका ठाउँबाट पनि राहत सामाग्री माग भएको अवस्थामा थाइ नेपाली संघका प्रतिनिधिहरू गएर राहत वितरण गरेका छन् ।

गत मे महिनामा थाइ नेपाली संघबाट भएको राहत वितरणबाट २५०८ परिवारका ८,६८५ व्यक्तिहरुले सेवा पाएका छन् । थाइ नेपाली संघका शाखा तथा उपशाखाहरूमा अवश्यकता अनुसार विहान वेलुका खानाहरू बनाइ दैनिक रूपमा ४०० भन्दा धेरै मानिसहरूलाई वितरण गरिएको छ । यस कार्यमा विभिन्न संघ संस्थाहरूले पनि थाइ नेपाली संघसँग मिलेर सहयोग गरेका छन् ।

संघले महामारी समयमा रक्तदान कार्य पनि गरेको छ । विविध रोग उपचारका कारण अस्पतालमा भर्ना हुनभएका साथै भर्ना हुन अप्ठ्यारो भएका र उपचार पश्चात आर्थिक अभावका कारणले अप्ठ्यारोमा परेका परिवारहरुलाई पनि दुःख निवारणले सहयोग गरेको छ ।

यसैगरी कोभिडको महामारीले समस्यामा परेका नेपालबाट अध्ययनका लागि आएका ५६ नेपाली विद्यार्थीहरुलाई पनि अन्य संस्था तथा नेपाली राजदुतावाससँग मिलेर राहतको कार्यमा सहयोग गरिएको छ । थाइल्याण्डबाट विदेश फर्कन चाहनेहरूलाई पनि सरकारी निकायहरूबाट कागजपत्र लगायत आवश्यकता अनुसार यातायात सुविधा मिलाउने कार्यमा संघले सहयोग गर्दै आएको छ । संघले कोभिदको महामारीले ग्रस्त भएको बेला पनि संघको दुःख निवारण विभागको सक्रियता भने थाइल्याण्ड देशभर सुचारु रहेको छ । आफूले सुरक्षाका विधि अपनाएर संघको दुःख निवारण विभागका प्रमुख, सदस्यहरु र सिंगो थाइ नेपाली संघको टीम राहतका कार्यहरुमा सरिक भएको थियो ।

महामारीको कारण अप्ठ्यारोमा परेको खण्डमा सूचना दिन संघले सामाजिक संजाल मार्फत सूचना जारी गरेको थियो । यस कार्यका लागि संघका महासचिव विनोद लामिछाने र दुःख निवारण विभागका प्रमुख रामकुमार ढुंगानालाई तोकेको थियो । विभागका प्रमुख ढुंगानाले संघका विभिन्न शाखाका पदाधिकारी तथा विभिन्न व्यक्तिहरुको सहयोगले गर्दा राहतका कामहरु गर्न सकिएको बताए । राहत र सामाजिक कार्यमा विभिन्न शाखाहरुबाट सहयोगको लागि उनले आभार व्यक्त पनि गरेका छन् ।

संघका महासचिव विनोद लामिछानेले पनि थाइल्याण्डका विभिन्न शहरमा आपतमा परेका व्यक्तिहरुले संघमा सम्पर्क राखेका र संघका शाखाहरुबाट सक्दो प्रयास भएको बताए । संघको तर्फबाट भएको राहत प्रक्रियामा सहयोग गर्नुहुने सबैलाई हामी धन्यवाद दिन चाहान्छौं । राहतका लागि विभिन्न व्यक्ति, संघ संस्थाबाट प्राप्त सहयोगका लागि थाइ नेपाली संघ धन्यवाद प्रकट गर्न चाहान्छु – थाइ नेपाली संघका अध्यक्ष कुमार कार्कीले भने । विपत्तिको समय गईनसकेकोले राहत वितरणको कार्यमा संघले अझै पनि काम गरिरहेको उनले जानकारी दिए ।