लद्दाख भिडन्तपछि चीनको कब्जामा परेका १० भारतीय सैनिक रिहा

लद्दाख भिडन्तपछि चीनले आफ्नो कब्जामा लिएका १० भारतीय सैनिकलाई रिहा गरेको छ । लद्दाखको विवादास्पद सीमा क्षेत्रमा गत सोमबार भएको भिडन्तको क्रममा नियन्त्रणमा लिएका सैनिकहरुलाई चीनले रिहा गरेको हो ।

रिहा हुनेहरुमा एक जना लेफ्टीनेन्ट कर्णेल, तीन जना मेजर र ६ जना जवानहरु रहेको सैनिक स्रोतलाई उद्धृत गर्दै भारतीय पत्रिका द हिन्दुले जनाएको छ । भारत सरकारले भने सैनिकहरुको रिहाइबारे केही जनाएको छैन । उसले लद्दाखको भिडन्तमा भारतीय सैनिकहरु बेपत्ता भएकोबारे पनि केही बोलेको थिएन ।

गत सोमबार गल्वान उपत्यकाको विवादास्पद सीमा क्षेत्रमा भारत र चीनका सैनिकबीच भिडन्त हुँदा २० भारतीय सैनिक मारिएका थिए । घटनामा ७६ भारतीय सेना घाइते भएको बताइएको छ । घटनापछि केही सैनिक सम्पर्कविहीन बनेका थिए ।