विद्यालयको वार्षिक उत्सवमा मेयर शाक्यले गरे संचार माध्यम प्रति गुनासो

काठमाडौं – काठमाडौं महानगरपालिकाका प्रमुख बिद्यासुन्दर शाक्यले सामूदायिक विद्यालयको गुणस्तर सुधार गर्न सक्ने हो भने संस्थागत विद्यालय स्वत कमजोर भएर जाने बताएका छन् ।

आज शिवपुरी माध्यमिक बिद्यालयको ७२ औंं बार्षिकोत्सव समारोहमा बोल्दै प्रमुख शाक्यले यस्तो बताएका हुन् । प्रमुख शाक्यले सामूदायिक विद्यालयले चुम्बकीय गुणको विकास गरेर संस्थागत विद्यालयको भन्दा गुणस्तयरीय शिक्षा दिने वातावरण निर्माण गर्नुपर्नेमा पनि जोड दिए । ‘नीजि क्षेत्रका विद्यालयले जसरी विद्यार्थी र अविभावकलाई आकर्षित गरिरहेको छन् अब त्यसैगरी विस्तारै सामूदायिक विद्यालयले पनि चुम्बकीय गुणको विकास गर्नुपर्छ,’ शाक्यले भने, ‘संस्थागत विद्यालयमा विद्यार्थीको आकर्षण बढ्यो भनेर गुनासो गर्ने होइन त्यो भन्दा राम्रो र गुणस्तरीय शिक्षा दिएर तपाईँहरु (विद्यार्थी)को भविश्य हामी बनाई दिन्छौँ भन्ने ग्यारेण्टी सामूदायिक विद्यालयले दिन सक्नुपर्छ । त्यो भयो भने सामूदायिकमा स्वत विद्यार्थीको चाप बढ्ने छ ।’

मेयर शाक्यले सामूदायिक विद्यालयका प्रधानाध्यापकहरुले पनि संस्थागत विद्यालयलाई निषेध होइन, मेरो विद्यालयमा अध्ययनरत विद्यार्थीको भविश्यको जिम्मा म लिन सक्छु भन्ने ध्येयका साथ पठन–पाठनमा ध्यान दिई विद्यार्थीका साथै अविभावकलाई पनि विस्वस्थ बनाउनु पर्नेमा जोड दिए । ‘सामुदायिक विद्यालयको शैक्षिक गुणस्तर निजी विद्यालयसँग समान बनाउने हो भने गुणस्तरीय शिक्षा खोज्दै अविभावक चर्को शुल्क तिर्नुपर्ने ठाउँमा जानुपर्ने वाध्यता स्वतः अन्त्य हुन्छ,’ उनले भने, ‘हामी बजारमा केही बस्तु किन्न जाँदा कसैले गुणस्तरीय बस्तु सस्तोमा दियो भने महंगोमा किन्न जाँदैनौँ, शिक्षा पनि त्यहि हो ।’

उनले विद्यालय शिक्षा स्थानीय तहको जिम्मेवारीमा आएपछि विद्यालय सुधारका केही प्रयासहरु गरेको पनि जानकारी दिए । उनले भित्रि सुधारको पाटो शिक्षक–शिक्षिकाकै भएको भन्दै शिक्षा समिति, विभाग र नगरसभाले निर्णय गरेर काठमाडौँ महानगरपालिका क्षेत्र भित्रका सम्पूर्ण सामूदायिक विद्यालयको भौतिक पूर्वाधार निर्माणको जिम्मा महानगरपालिकाले लिएको पनि जानकारी दिए । उनले सामुदायिक बिद्यालयका शिक्षक/शिक्षिकालाई शैक्षिक गुणस्तरमा संवेदनशील पनि आग्रह गरे । उनले गुणस्तरीय शिक्षाका लागि आवश्यक पर्ने नीति महानगरले बनाउने भन्दै स्रोतको समस्या नभएको प्रष्ट पारे ।

मेयर शाक्यले विद्यालयमा स्थापना गरिएको सूचना प्रविधि प्रयोगशालाको उद्घाटन गरे । दूरसञ्चार प्राधिकरणको सहयोगमा २४ वटा कम्प्युटरसहितको प्रयोगशाला स्थापना गरिएको हो ।

‘बिद्यालयमा शौचालय बनाउने, धुलोमुक्त खेल मैदानका लागि पूर्वाधार तयार पार्ने, बिद्यालयलाई आकर्षक बनाउन रङ्ग लगाउने, महावाणी र भित्ते चित्र लेखन गर्नेलगायत काममा हामीले लगानी गरिरहेका छौं । सामुदायिक विद्यालयको स्तर उकास्न विद्यालय व्यवस्थापन समिति, विद्यालय प्रशासन, शिक्षक/शिक्षिका र अभिभावक सबै मिलौं,’ प्रमुख शाक्यको भनाइ थियो ।

उनले महानगरपालिका सूचना प्रबिधिमा आधारित शैक्षिक कार्यक्रममा केन्द्रीत रहेको पनि बताए ।

आफुले गरेको राम्रो कामलाई पनि संचार माध्यमले बंग्याउने गरेको र पत्रकारहरु आफ्नो पेश प्रति मर्यादित नभएको पनि उनले गुनासो गरे । सामाजिक संजालमा लाइक र कमेन्ट पाउनको लागि नभएर जनताको सेवामा समर्पित भएर आफु लागि परेको पनि मेयर शाक्यले बताए। सामाजिक प्रतिष्ठा बनाउन निकै समय लाग्ने तर केहि संचार माध्यमको गलत सूचना प्रवाहाले सामाजिक प्रतिष्ठामा आंच पुग्ने गरेको पनि मेयर शाक्यले आक्रोश ब्यक्त गरे ।

समारोहमा विद्यालय व्यवस्थापन समितिका पूर्वअध्यक्ष, सेवा निवृत्त शिक्षक शिक्षिकालाई सम्मान प्रदान गरिएको थियो । त्यस्तै विद्यालयमा २५ बर्ष सेवा अवधि पूरा गर्ने शिक्षक शिक्षिकालाई शिवपुरी शिक्षा सेवा पदक उत्कृष्ठ शिक्षा सम्मान प्रदान गरिएको थियो ।

विद्यालयले कोभिड नियन्त्रणका उत्कृत्ठ काम गरेको जनाउँदै वडा ३ का अध्यक्ष दीपक के. सी. लाई बिशेष सम्मान गरेको थियो ।

बिद्यालयमा कक्षा १२ सम्म करीव १ हजार ३ सय बिद्यार्थी छन् ।