‘प्रेमिका’को अर्धनग्न तस्बिर/भिडिओ सार्वजनिक गरेपछि…

मकवानपुर – आफ्नै केटी साथीको अर्धनग्न तस्बिर/भिडिओ पोर्न साइटमा हाल्ने एक जना पक्राउ परेका छन्।

प्रहरीले मकवानपुर हेटौंडा उपमहानगरपालिका-४ पारिजातपथ बस्ने ३६ वर्षीय अस्लम अन्सारीलाई पक्राउ गरेको हो।

उनलाई प्रहरीले मंगलबार जिल्ला प्रहरी कार्यालय मकवानपुरको सहयोगमा पक्राउ गरेको हो।

उनीमाथि यौन उत्पीडन दिएको, तस्विरहरू हटाउन पैसा मागेर दु:ख हैरानी दिएको आरोप छ।

साइबर ब्युरोका प्रहरी वरिष्ठ उपरीक्षक  (एसएसपी) नविन्द अर्यालका अनुसार अन्सारीले आफ्नै प्रेम सम्बन्धमा रहेकी महिलालाई हैरानी दिएका हुन्।

उनीहरूबीच नेपालमा हुँदा सामाजिक सञ्जालमार्फत् चिनजान भएको थियो।

‘उनीहरूबीच पहिले यता नेपालमा चिनजान भएको रहेछ। महिला थाइल्याण्ड गइन्,’एसएसपी अर्यालले भने,’अन्सारी पनि त्यहाँ गएर सँगै बसे।’

उनका अनुसार अन्सारी विवाहित पुरूष हुन्। तर पीडित महिलालाई भने त्यसको जानकारी थिएन।

ती पुरूष नेपाल फर्किएपछि उनले खिचेका अर्धनग्न तस्बिर/ भिडिओ पोर्न साइटमा अपलोड गरेका थिए।

अपलोड गरेपछि उनले ती महिलासँग एक हजार ९८ डलर माग राखेका थिए।

त्यसरी हैरानी दिएपछि पीडित महिलाले उतैबाट उजुरी दिएको एसएसपी अर्यालले बताए।

‘महिला उतै विदेशमै छन्। यसले चाहिँ विदेशमा भएको मान्छेलाई पनि यहाँ बसेर दु:ख दिने हैरानी गर्न पाइन्न भन्ने बुझाउँछ,’ उनले भने।

अन्सारीमाथि प्रहरीले विद्युतीय कारोबार ऐन, २०६३ को दफा ४७ बमोजिमको थप अनुसन्धान अघि बढाएको छ।

त्यसैगरी फेसबुकमा एक महिलाको फेस आइडी बनाई आफन्तलाई यौनजन्य, अश्लिल सन्देश तथा तस्बिर पठाउने अर्का एक जनालाई पनि साइबर ब्युरोले पक्राउ गरेको छ।

ब्युरोले गोरखा घर भई ललितपुर गोदावरी नगरपालिका-११ चापागाउँ बस्ने २० वर्षीय रोलकबहादुर थापालाई पक्राउ गरेको हो।

उनलाई पनि प्रहरीले मंगलबार नै पक्राउ गरेको ब्युरोले जनाएको छ।

उनीमाथि प्रहरीले थप अनुसन्धान अघि बढाएको छ।