गत वर्ष तनावग्रस्त रहेको रातो मछिन्द्रनाथको रथयात्रा यस वर्ष प्रतीकात्मक मात्र

ललितपुर – गत वर्ष लामो समयसम्म अन्यौल रहेर भएको विवादले उग्र रुप लिँइ झडप समेत हुन पुगेको रातो मच्छिन्द्रनाथको रथयात्रा यस वर्ष भने प्रतीकात्मक रुपमा तानेर मात्र सम्पन्न गरिने भएको छ ।

सरोकारवालाहरुको बैठकले कोरोना महामारीलाई मध्यनजर गर्दैै न्यून संख्यामा मात्र उपस्थित भएर स्वास्थ्य सुरक्षाको मापदण्ड अपनाएर प्रतीकात्मक रुपमा जेठ १ गत रथ तान्ने निर्णय गरेको ललितपुरका सहायक प्रमुख जिल्ला अधिकारी ललितकुमार बस्नेतले जानकारी दिए ।

कोभिड–१९ संक्रमणको बढ्दो जोखिमलाई मध्यनजर गर्दै यस्तो निर्णय गरिएको पनि उनले बताए ।

जिल्ला सुरक्षा समितिको बैठकले जनस्वास्थ्य मापदण्डको अनिवार्य रुपमा पालना गरी सुरक्षा घेराभित्र रथयात्रालाई अनुशासित र मर्यादित रुपमा सम्पन्न गर्न सबै सुरक्षा निकायहरुले समन्वयात्मक कार्य गर्ने निर्णय भएको पनि जानकारी दिईएको छ ।

रातो मच्छिन्द्रनाथको रथयात्रालाई नेपालकै लामो रथजात्राको रुपमा लिने गरिएको छ।