युरोकपः प्री क्वार्टर फाइनलका खेलहरु आजबाट सुरु

एजेन्सी – युरोपको विभिन्न ११ शहरमा जारी १६ औं संस्करणको युरोकप फुटबलको अन्तिम चरणका १६ को खेलहरु आजबाट सुरु हुने भएका छन् ।

नकआउट चरण अन्तर्गत आज रातिको पहिलो खेल पौने १० बजे वेल्स र डेनमार्क तथा पौने १ बजे इटाली र अष्ट्रिया प्रतिस्पर्धामा उत्रिदै छन् ।

वेल्स र डेनमार्कबीचका खेल नेदरल्यान्ड्सको जोहान क्रुफ एरिनामा हुनेछ । डेनमार्क समूह ’बी’ का ३ खेलमा ३ अंक जोडेर उपविजेता बन्दै अन्तिम १६ मा पुगेको हो ।

त्यस्तै, वेल्स ३ खेलमा ४ अंक जोडेर समूह ’ए’ को उपविजेता बन्दै नकआउट चरणमा पुगेको हो । डेनमार्क र वेल्सबीच अहिलेसम्म १० पटक प्रतिस्पर्धा भएको छ । जसमा डेनमार्क ६ पटक विजयी हुँदा वेल्सले ४ खेल जितेको छ ।

इटाली समूह ’ए’ का सबै खेल विजेता बन्दै नकआउट चरणमा पुगेको हो । अष्ट्रिया भने ३ खेलमा ६ अंक बटुलेर समूह ’सी’ को उपविजेता बन्दै नकआउट चरणमा पुगेको हो ।