घनश्यामभन्दा बादल प्यारो बनेको एमालेको १० औँ महाधिवेशन

काठमाडौँ –  चितवनमा भएको नेकपा एमालेको १० औँ महाधिवेशनमा घनश्याम भुसाल पराजित भएका छन् ।

उपाध्यक्ष पदका लागि भएको निर्वाचनमा एमालेका पुराना नेता तथा बौद्घिक नेतामा गनिने भुसाललाई भन्दा पूर्वमाओवादीका नेता रामबहादुर थापा बादललाई बढि मत दिएर जिताइएको छ ।

उपाध्यक्षमा सुरेन्द्र पाण्डेले १९२५ मत, सुवास नेम्वाङले १८६५ मत, विष्णु पौडेलले १८५६ मत, प्रदिप ज्ञवालिले १८७२ मत र बादलले १७६८ मत पाउदा नेता भुसालले भने जम्मा ७२५ मत मात्र पाएर पराजित भएका हुन् ।

एमाले अध्यक्ष केपी ओलीले भुसालबाहेक ६ जनालाई उपाध्यक्षमा प्रस्ताव गरेका थिए । उपाध्यक्षमा नसमेटिएका भुसालले उम्मेदवारी दर्ता गरेका थिए ।

एमालेका कुनै समयका प्रभावशाली तथा बौद्घिक नेतालाई एमाले प्रतिनिधिले अविश्वास गरिनु र पूर्व माओवादीका नेता बादललाई विश्वाससहित ठूलो मतले विजयी गराइनु चर्चाको विषय बनेको छ ।