मछिन्द्र लगातार दोस्रो पटक च्याम्पियन

मछिन्द्र फुटबल क्लबले कतार एयरवेज सहिद स्मारक ‘ए’ डिभिजन लिग फुटबलको उपाधि जितेको छ ।बुधबार भएको खेलमा सातदोबाटो युथ क्लबलाई १-० गोल अन्तरले हराउँदै मछिन्द्र दुई खेल अगाबै च्याम्पियन बनेको हो ।

त्रिपुरेश्वरस्थित दशरथ रंगशालामा मछिन्द्रलाई जित दिलाउन नोर्लान नोभ्रुजोभले निर्णायक गोल गरे । दशरथ रंगशालामा भएको खेलको ५३औं मिनेटमा नुर्लानले गोल गरेका थिए । सुनिल बलको क्रसमा देवेन्द्र तामाङले हेड गरेका बल सातदोबाटोका गोलकिपर अभिषेक बराललाई टच हुँदै बारमा लागेर फर्कियो र रिबाउण्डमा नुर्लानले गोल गरे । त्यसपछि थप गोल हुन नसक्दा मछिनन्द्रको जित पक्का भएको हो ।

यो जितपछि मछिन्द्रले ११ खेलबाट २९ अंक जोडेको छ । एक खेल कम खेलेको मनाङ २० अंकसहित दोस्रो स्थानमा छ । यसअघि मछिन्द्रले मनाङलाई हराइसकेकोले मछिन्द्र हेड टु हेडमा अघि छ र मनाङले बाँकी तीन खेल जिते पनि मछिन्द्रलाई भेट्ने छैन ।

सुरुवातदेखि नै प्रतिस्पर्धात्मक बनेको खेलमा सुरुको दश मिनेट सातदोबाटोले विपक्षीमाथि दबाब बनाएको थियो । त्यसपछि भने मछिन्द्रले खेलमा लय समात्यो । पहिलो हाफमा मछिन्द्रका विमल घर्ती मगरले दुई अवसर गुमाए ।