भीम रावलले मिलाए गृहजिल्लामा एमाले र समाजवादी

अछाम – अछामको मेल्लेख गाउँपालिकामा एमाले र एकीकृत समाजवादीबीच चुनावी तालमेल भएको छ ।

समाजवादीले पालिका अध्यक्षमा एमालेका भीमबहादुर खड्का र एमालेले उपाध्यक्षमा समाजवादीकी समिता महरलाई समर्थन गरेको छ ।

दुई दलबीचको सहमतिसँगै समाजवादीका अध्यक्ष उम्मेदवार डम्बर नेपाली र एमालेकी उपाध्यक्ष उम्मेदवार चन्द्रा बुढाले उम्मेदवारी फिर्ता लिएका छन् ।

काँग्रेस र माओवादी केन्द्र मिलेर आफूलाई एक्ल्याएको भन्दै समाजवादी एमालेसँग मिलेको हो । ८ वडामध्ये ७ वटामा एमाले र एकमा एकीकृत समाजवादीले लिने सहमति पनि दुई दलबीच भएको छ । श्रोतका अनुसार सहमति निर्माणमा एमाले नेता भीम रावलको भूमिका छ । माधव नेपाल समूहमा रहेका रावल अन्तिम समयमा आएर एमालेमै रहेका थिए ।

चितवन महाधिवेशनमा अध्यक्षमा केपी ओलीसँग टक्कर लिएका रावल परिभाषित सांगठनिक जिम्मेवारीमा छैनन् । ओली र रावलबीच बेलाबेला सार्वजनिक रुपमै जुहारी चल्दै आएको छ ।