बालेन शाहले ल्याएको नीति तथा कार्यक्रमको कमल थापाले गरे प्रशंसा

काठमाडौँ महानगरपालिकाका मेयर बालेन्द्र शाह (बालेन)ले प्रस्तुत गरेको आगामी आर्थिक वर्षको नीति तथा कार्यक्रमको राप्रपा नेपालका अध्यक्ष कमल थापाले प्रशंसा गरेका छन् ।

आइतबार मेयर बालेनले सबै पक्षलाई समटेर नीति तथा कार्यक्रम ल्याएका थिए । उक्त नीति तथा कार्यक्रमको अध्यक्ष थापाले प्रशंसा गर्दै स्याबासी दिएका छन् । सामाजिक सञ्जालमार्फत उनले स्याबासी दिँदै भनेका छन्, ‘आशा आकांक्षा असीमित हुन्छन् । यो पनि त्यो पनि भइदिए हुन्थ्यो भन्ने चाहना राख्नु स्वाभाविकै हो । तथापि काठमाडौंको समग्र विकासका लागि बालेन्द्र शाहद्वारा प्रस्तुत नीति तथा कार्यक्रम प्रशंसानीय छ ।’

थापाले मूलतः काठमाडौँको संस्कृति एवं सम्पदाको संरक्षण–संवद्र्धन र शिक्षा विकासमा ध्यान दिनु उक्त नीति तथा कार्यक्रमको राम्रो पक्ष रहेको बताएका छन् । साथै नीति तथा कार्यक्रम कार्यान्वयनका लागि उनले शुभकामना समेत दिएका छन् ।