सरकारलाई अधिकार सम्पन्न, प्रदेश खारेज गर्नुपर्छः कमल थापा

राप्रपा नेपालका अध्यक्ष कमल थापाले संघीयताको स्वरुप फेर्नुपर्ने बताएका छन् ।

थापाले प्रदेश सरकार खारेजी र स्थानीय सरकारलाई अधिकार सम्पन्न गराउनुपर्ने बताए । ‘वर्तमान अवस्थाको संघीयता ठीक छैन’, वीरेन्द्रनगरमा सञ्चारकर्मीसँग शुक्रबार थापाले भने, ‘प्रदेश संरचना खर्चिलो भयो ।’

यसको औचित्य पनि छैन । उनले मुलुकमा तीन तहको नभई दुई तहको संघीयता जरुरी रहेको बताए । उनले बाह्य शक्तिको प्रभावमा मुलुकमा जबर्जस्ती संघीयता थोपरिएको दाबी गरे ।

फरक प्रसंगमा उनले संसारमा सबैभन्दा बढी धर्म परिवर्तन हुने मुलुकमा नेपाल रहेको बताए । धर्म परिवर्तनको लहरले हिन्दू धर्ममा आगो लागेको उनको भनाइ थियो । नेपालमा राजतन्त्र पुनस्र्थापनाको सम्भावना भने नरहेको उनले बताए ।