जनार्दन शर्माको बयानः बिचौलियाबारे सुरक्षाकर्मी र पिएसओलाई सोध्नु

पूर्वअर्थमन्त्री जनार्दन शर्माले बजेट निर्माणका क्रममा बिचौलिया प्रवेश गरे नगरेको विषयमा सुरक्षाकर्मी र पिएसओलाई सोध्न आग्रह गरेका छन् ।

बजेट निर्माणमा करको दर हेरफेर गर्न बिचौलियाका रुपमा अनधिकृत व्यक्ति प्रवेश र सीसीटीभी फुटेज डिलिट प्रकरणबारे छानबिन गर्न गठित संसदीय समितिमा बिहीबार बयानका लागि उपस्थित भएका शर्माले अनधिकृत व्यक्ति प्रवेश गराएको आरोप अस्वीकार गरे ।

‘बजेट निर्माणमा जो संलग्न हुनुपर्ने हो त्यो बाहेक कसैको प्रवेश भएको छैन’, शर्माले भने, ‘मेरो विश्वास नलागे सुरक्षाकर्मी र पिएसओलाई सोधे हुन्छ नि ।’

अर्को प्रसंगमा उनले सीसीटीभीमा भिडियो अभिलेख कति दिनसम्म रहन्छ भन्नेबारे आफूलाई जानकारी नहुने जवाफ दिए ।

‘म प्राविधिक होइन सीसीटीभीमा कति दिन भिडियो रहन्छ भन्नेबारे मलाई थाहा हुने कुरा भएन’, ‘यो विषयमा मलाई होइन, प्राविधिकलाई सोध्नुस् ।’

शर्माले कुनै अमुक व्यापारी पोस्न आफूले काम नगरेको दाबी गरे ।