जनार्दनलाई प्रचण्डको जवाफः तपाईंलाई मैले हुर्काएको हो

माओवादी केन्द्रका अध्यक्ष पुष्पकमल दाहाल ‘प्रचण्ड’ ले पार्टी उपमहासचिवसमेत रहेका अर्थमन्त्री जनार्दन शर्मालाई आफूले हुर्काएर ल्याएको बताएका छन् ।

पार्टी सम्वद्ध विद्यार्थी संगठन अखिल क्रान्तिकारीले राजधानीमा बुधबार गरेको कार्यक्रममा प्रचण्डले शर्मा आफ्नो संरक्षणमा हुर्किएको बताए । ‘जनार्दनजीले भन्नुभयो नीति र नेतृत्वको रक्षाका कुरा’, प्रचण्डले भने, ‘म तपाईंहरुलाई के भन्न चाहन्छु भने जनार्दनलाई रक्षा गर्ने र हुर्काउनेमा पनि प्रचण्डकै मुख्य भूमिका छ । उनको रक्षा गर्ने र विकास गर्ने कुरामा पनि ।’

आफूभन्दा अघि कार्यक्रममा बोलेका शर्माले आफू प्रचण्डको आलोचक र समर्थक दुवै भएको बताएपछि उनले जवाफ फर्काएका हुन् । उनले सही नीति र नेतृत्वको मात्र समर्थन गर्न सकिने बताए ।

‘अध्यक्षको सबैभन्दा कडा आलोचक मै हुँ,’ शर्माले भनेका थिए, ‘अध्यक्ष कमरेडको संरक्षण गर्ने पनि मै हुँ । नेतृत्वको कमजोरीको आलोचना गनुर्पछ ।’