विजय गच्छेदार र प्रभु साहसहित ९ जनाको उम्मेदवारी खारेज गर्न सर्वोच्चमा रिट

आगामी प्रतिनिधि तथा प्रदेशसभा निर्वाचनमा उम्मेदवारी दिएका ९ जनाको उम्मेदवारी खारेज गर्न सर्वोच्च अदालतमा रिट दर्ता भएको छ ।अधिवक्ता अनिल आचार्यले ९ जनाको उम्मेदवारी खारेज गर्न माग गर्दै बिहीबार रिट दर्ता गरेका हुन् ।

बालुवाटार प्रकरणमा मुछिएको विजयकुमार गच्छादारसहित प्रभु साह, गोविन्दराज जोशी, सरिता गिरी, विक्रम पाण्डे, टेक बहादुर गुरुङ, लक्ष्मी महतो, युद्ध विक्रम तामाङ र रेवतराज पुरीकोे उम्मेदवारी खारेज गर्न रिट दायर गरेका हुन् ।

रिटमा भनिएको छ, ‘प्रस्तुत विषयमा तत्काल अन्तरिम आदेश जारी नगरेको अवस्थामा विपक्षीहरुले प्रतिनिधिसभा सदस्य तथा प्रदेश सभा सदस्यको उम्मेदवार बनि निर्वाचनमा भाग लिन पाउने भएकोले देश र जनताको भावना तथा भविष्यमाथि शक्ति सन्तुलनको रोहमा हुने अपुरणीय क्षतिलाई न्युनिकरण गर्नको लागि विपक्षीहरुको नाममा सर्वोच्च अदालत नियमावली, २०७४ को नियम ४९ बमोजिम अन्तरिम आदेश समेत जारी गरीपाऊँ ।’