केपी ओलीको विरोध गर्दै ७६ जनाद्वारा सामूहिक रुपमा एमाले परित्याग

बारामा ७६ जनाले एमाले परित्याग गरेका छन् ।

बारा–३ मा पार्टीले उठाएको उम्मेदवारविरुद्ध असन्तुष्ट नेता कार्यकर्ताले पार्टी छाडेका हुन् । मधेस प्रदेश कमिटी सदस्यहरु श्रीकाजी मोक्तान, उमेश कुशवाह, कलामुद्दीन अन्सारी, प्रदीप साह र देवराज घिमिरेसहित छन् ।

एमालेले बारा–३ मा माओवादीबाट आएकी ज्वालाकुमारी साह र बारा–२ (ख) मा मोहम्मद समिरलाई प्रतिनिधिसभा सदस्य उम्मेदवार बनाएकामा उनीहरुले आपत्ति जनाउँदै आएका थिए । ४० वर्षदेखि पार्टीमा कार्यरत, योग्य, दक्ष र इमान्दार उम्मदेवार हुँदाहुँदै कार्यकर्ताको चाहना र भावनाविपरीत कार्यकर्ताको घोर अपमान र लज्जा महसुस हुने गरी उम्मेदवार खडा गरिएको उनीहरुले जारी गरेको संयुक्त विज्ञप्तिमा उल्लेख छ ।

‘पार्टीभित्र व्यक्तिवादी नियन्त्रण कायम गरेर आलोचना आत्मलोचनाको परिपाटी समाप्त गरी निषेधको राजनीति अघि बढाइएको, पार्टीको दर्शन, विचार, नीतिको सैद्धान्तिक स्खलन भएको आरोप उनीहरुले लगाएका छन् ।

एमाले नेताहरुका गतिविधि र व्यवहारका कारण श्रमिक, किसान, मजदुरका साथै नेपाल र नेपाली जनताको हित र जीवनस्तर सुधारका पक्षमा जनअपेक्षाअनुसार काम हुने अवस्था नदेखिएकाले पार्टी परित्याग गरेको उनीहरुको भनाइ छ ।