ललितपुर – ३ मा कसले मार्ला बाजी ?

मंसिर ४ गतेको प्रतिनिधि तथा प्रदेश सभा सदस्यको निर्वाचनका लागि सबै उम्मेदवारहरु घर-दैलो कार्यक्रममार्फत प्रचार-प्रसार गरिरहेका छन् । ललितपुर जिल्लाका ३ निर्वाचन क्षेत्र मध्ये ललितपुर-३ लाई यस कारण पनि महत्वका साथ हेरिने गरेको छ की, माओवादी केन्द्रकी प्रभावशाली नेतृ पम्फा भुषाल यस क्षेत्रबाट प्रतिनिधि सभा सदस्यको उम्मेदवारको रुपमा रहेकी छिन् ।

चुनाव प्रचार प्रसारको गति तीब्र छ, अनेक अड्कलबाजीहरु पनि चलिरहेका छन् । हामीले यसै क्षेत्र केन्द्रित रहेर केही सर्वसाधरण, राजनीतिक व्यक्तिव र समाजमा प्रत्यक्ष रुपमा सरोकार राख्ने व्यक्तिवहरुसँग ललितपुर-३ को सम्भाब्यताका बारेमा कुराकानी गरेका थियौँ । त्यसै कुराकानीमा आधारित रहेर सटिक विश्लेषण गर्ने प्रयास गरेका छौँ ।

पम्फा भुषाल (बाम – लोकतान्त्रिक गठबन्धन)

यस अघि बाम-गठबन्धनबाट उम्मेदवारको रुपमा प्रस्तुत भएर प्रतिनिधि सभा सदस्यका रुपमा निर्वाचित पम्फा भुषाल यस पटक बाम – लोकतान्त्रिक गठबन्धनको तर्फबाट साझा उम्मेदवारको रुपमा चुनावी मैदानमा उत्रिएकी छिन् । यस क्षेत्र नेकपा एमाले र नेकपा एकीकृत समाजवादी फुटको ठूलो असर देखिएको क्षेत्र पनि हो । एकीकृत समाजवादी, माओवादी केन्द्र र नेपाली कांग्रेसको सम्पूर्ण भोट भुषाललाई गएको खण्डमा कुनै प्रतिस्पर्धा बिना नै भुषालले चुनाव जित्ने निश्चित छ । तर चुनाव यति सहज हुने भने छैन । स्थानीय निकायको निर्वाचनले नै नेपाली कांग्रेसको भोट एकलौटी रुपमा माओवादी केन्द्रलाई नजाने प्रष्टाइ सकेको छ । नेपाली कांग्रेसबाट गठबन्धन नभएको खण्डमा संभावित टिकट पाउने उम्मेदवारको समुह भुषालको उम्मेदवारीसँग रुष्ट रहेको छ । उक्त समुहले भुषाललाई कुनै पनि हालतमा भोट नदिने गोप्य लबिङ्गमा रहेको छ । यदी यसो भएमा भुषाललाई सहज नहुन सक्छ । स्थानीय निकायको चुनावमा एकीकृत समाजवादी र माओवादी केन्द्रको केही मतभेदका कारण पनि एकीकृत समाजवादीका मतदाताहरुको पनि भुषालसँग चित्त दुखाइ रहेको छ । आफ्नै क्षेत्रको साम्सद बारम्बार मन्त्री भइरहदा पनि विविध समस्याहरु यथावत रहेको बुझाइ स्थानीयहरुको पनि रहेको छ । यसरी हालसम्मको अवस्था हेर्दा भुषाललाई गठबन्धन कै भोट एकलौटी रुपमा नआउने देखिन्छ, जसका कारण भुषालको पुनः संसदको यात्रा कठिन हुन पुग्छ ।

अमृत खड्का (नेकपा एमाले)

युवा उद्यमी अमृत खड्काले निकै कष्टसँग नेकपा एमालेबाट ललितपुर-३ को प्रतिनिधि सभा सदस्य उम्मेदवारको टिकट हात पारे । बाबुराम थापासँगको निक्कै ठूलो रस्साकस्सीसँगै टिकट हत्याए पनि खड्कालाई पनि चुनाव जित्न त्यति सहज भने छैन । आफ्नो पार्टी नेकपा एमालेले व्यहोरेको फुटको प्रभाव यस क्षेत्रमा उल्लेख्य रुपमा रहेको छ । आफ्नै पार्टी भित्रका असन्तुष्ट समुहको भय पनि छ खड्कालाई । आफ्नै पार्टी भित्रका असन्तुष्ट समुहले नै खड्कालाई हराउन प्रयासरत छन् । आफ्नो पार्टीको सम्पूर्ण मत आउदाँको अवस्थामासमेत विजयी हुन कठिन देखिएका खड्काको पार्टि भित्र कै असन्तुष्ट समुहको भोट नआएको खण्डमा जित झन् कठिन हुन जाने देखिन्छ । तर खड्काले बाम लोकतान्त्रिक गठबन्धन भित्रका असन्तुष्ट समुह आफ्नो पक्षमा पार्न सके भने जित केही सहज हुन सक्छ । फुट भएता पनि एकीकृत समाजवादीका केही निकट व्यक्तिहरुको भोट खड्काले आफ्नो पक्षमा पार्न सक्दछन् । यसरी कठिन अवस्थाका बाबजुत पनि खड्कालाई केही सहज हुन सक्ने देखिन्छ ।

तोशिमा कार्की (राष्ट्रिय स्वतन्त्र पार्टी)

राष्ट्रिय स्वतन्त्र पार्टीबाट ललितपुर-३ मा प्रतिनिधि सभा सदस्य उम्मेदवार डा. तोशिमा कार्कीको चर्चा यति बेला ललितपुरमा मात्र नभएर देशभर नै चुलिएको छ । नयाँ पार्टी भएका कारण एकिन भोट यति नै छ भन्ने प्रष्ट नभएपनि ललितपुर-३ बाट डा. कार्कीले मतको संख्या राम्रै पाउन सक्ने देखिन्छ । बाम-लोकतान्त्रिक गठबन्धनकी हेभि वेट प्रतिस्पर्धी पम्फा भुषाल र नेकपा एमालेका उम्मेदवार अमृत खड्कासँगको टकराव त्यति सहज डा. कार्कीलाई पनि हुने देखिदैन । तर पछिल्लो लहरलाई हेर्ने हो भने सक्षम युवा उम्मेदवारलाई पुराना नेतासँग आजित भएका मतदाता र राजनीतिसंग टाढा रहेका युवाहरुको भोट डा. कार्कीलाई जाने देखिन्छ । बाम-लोकतान्त्रिक गठबन्धनका असन्तुष्ट समुह र नेकपा एमालेका असन्तुष्ट समुहहरुको भोट डा. कार्कीलाई नै गयो भने उनको संसदको यात्रा सहज हुन सक्छ । तर बाम-लोकतान्त्रिक गठबन्धन असन्तुष्ट समुहको भोट एमालेका उम्मेदवार र एमालेका असन्तुष्ट समुहको भोट भुषालले तान्न सकेको अवस्थामा डा. कार्कीलाई कठिन हुन सक्छ ।