ताम्रकार समाजमा सामुहिक बार्हा (गुफा)

आफ्नी नौ बर्षीया छोरीलाई आफुबाट चार चारदिन अलग राख्नुपर्दा भक्तपुरकी निजिना कायस्थ ताम्रकारलाई कम्ती छट्पटी भएको होइन। पेशाले चिकित्सक उनी नेपालमा बालिकाहरुलाई चाहिने अनिवार्य बिधीव्यवहार बार्हा (गुफा) राख्नका लागि ताम्रकार समाजको जिम्मामा छोरीलाई छाडेर गएकी थिईन् । उता छोरी इप्सा कायस्थ भने यस अवधिभर औधी खुसी थिईन् । उनलाई आमा साथमा नभएको फिटिक्कै अनुभूति थिएन, किनभने उनकै उमेरका थप २३ जना केटी साथीहरुसँगै बस्ने, खेल्ने, खानेका साथै विभिन्न नयाँनौलो कुराहरु सिक्न पाइरहेकी थिए । आफूपनि कामको सिलसिलामा बाहिर रहनुपर्ने भएकोले छोरीको लागि चाहिने अनिवार्य विधीव्यवहार घरमै गर्न सम्भव नभएको डा. निजिना बताउँछिन् । यस्ता विधी व्यवहारलाई सामुहिक रुपमै गरिदिएकोमा ताम्रकार समाज प्रति कृतज्ञ छिन् उनी ।

ताम्रकार समाजको व्यवहार व्यवस्था उपसमितिबाट पाँचौं पटकको सामुहिक बाह्रामा कुल २४ जवान कन्याहरुको सहभागिता रहेको छ । समाजका निवर्तमान अध्यक्ष रविन्द्र राज ताम्रकारको भनाईलाई मान्ने हो भने समाजबाट गरिदैँ आइरहेको विभिन्न कार्यहरु मध्येपनि आत्मसन्तुष्टी दिने खालको कार्य हो यो । नेपाली परम्परा अनुसार बालिकाहरुको शारिरीक स्थितिको विकासको लागि अपरिहार्य बिधीलाई ताम्रकार समाजले सामुहिकरुपमा गर्दै आइरहेको उनले बताए । समाजका अध्यक्ष बिनोद ताम्रकारले समाजले सदैव नेपाली परम्परा, संस्कृति, संस्कार, बिधीव्यवहार, सम्पदाहरुको संरक्षण, सम्वद्र्धनका लागि कामगर्दै आइरहेको बताए । उनले परम्परागत बार्हा (गुफा) विधी व्यक्तिगतरुपमा गर्दा सार्है खर्चिलो हुनका साथै विभिन्न कठिनाईहरु आउने भएका कारण पनि सामुहिकरुपमा यस कार्यलाई गर्दै आइरहेको बताए ।

उपसमितिका संयोजक मनोज ताम्रकारले समाजबाट नियमितरुपमा सामुहिक बेलविवाह, ब्रतबन्ध जस्तै बार्हा (गुफा) पनि विगत केही बर्षदेखि गर्दै आइरहेको बताए । उनले नेवारी परम्परा अनुसार २४ कन्याहरुलाई एउटै कोठामा राखेर बार्हा (गुफा)को आवश्यकता, महत्वका बारेमा तथा शारिरीक विकासका विविध पक्षहरुका बारेमा ज्ञान दिइने गरेको जानकारी दिए । सो अवधिभर सहभागी कन्याहरुलाई विभिन्न श्रोत व्यक्तिहरुको माध्यमबाट व्यक्तित्व विकास, उत्प्रेरणा, सकारात्मक सोच, शारिरीक विकास, यौन दुव्र्यवहार, साइवर अपराध, स्वास्थ्य, कला, संस्कृति, सम्पदा, योगा लगायतका क्रियाकलापहरु गराउँदै आइरहेको थियो । यसका साथै सहभागीहरुलाई प्रत्येकदिन चित्रकला तथा नृत्यकलाको प्रशिक्षण पनि दिइएको थियो ।

सामुहिक बार्हा (गुफा) को अवलोकन गर्न तथा सहभागी कन्याहरुको मनोवल बढाउन आएकी ललितपुर महानगरपालिकाकी उप-मेयर मंजली शाक्य बज्राचार्यले समाजको उक्त कार्यको उच्च प्रशंसा गर्दै अन्य समाजहरुले पनि यस्ता कार्यहरुको अनुसरण गर्नुपर्ने बताइन् । यसका साथै ताम्रकार समाजबाट हालै आयोजना गरिएको सामुहिक ब्रतबन्धमा पनि २० जवान वटुकहरुको सहभागीता रहेको थियो ।