विश्व नेवार दिवसको कार्यक्रम ललितपुरको केशवनारायण चोकमा सम्पन्न

विश्वभर रहेका नेवारहरुको साझा दिवसको रुपमा वर्षेनी मनाई आएको विश्व नेवार दिवस शनिबार ललितपुरको केशवनारायण चोकमा सम्पन्न भएको छ ।

हास्य सम्राट मदनकृष्ण श्रेष्ठको मुख्य आतिथ्यमा भएको उक्त सातौं विश्व नेवार दिवस कार्यक्रममा वरिष्ठ भाषासेवी कथाकार राजा शाक्य, प्रा. सुवर्ण शाक्य, वरिष्ठ कलाकार किरण मानन्धर, विश्व च्याम्पियन भारोत्तोलन खेलाडी महेश्वर महर्जन, मा. ध्रुव बहादुर प्रधान, डा. पुकार चन्द्र श्रेष्ठ (वरिष्ठ नेफ्रोलोजिष्ट), उद्योगी सुसन कर्माचार्य, पर्यटन व्यवसायी अजय स्थापित, वरिष्ठ इतिहासविद् योगेन्द्र मान श्रेष्ठ, वरिष्ठ निर्देशक तथा कलाकार पवन जोशी, वरिष्ठ पत्रकार सुरेश किरण मानन्धर, समाजसेवी यूरीकाजी कसाःलाई सम्मान गरिएको छ । यसै गरी संस्थागत रुपमा नेपाः पासा पुचः अमेरिकाय् (मेरिल्याण्ड) र झी पुचः (विराटनगर)लाई पनि सम्मान गर्ने कार्य भएको छ ।

संगीत क्षेत्रको पुरस्कारको रुपमा स्थापित स्व. रमेश ताम्राकार सम्झना पुरस्कार गायिका निशा देसारलाई प्रदान गरिएको उक्त कार्यक्रममा नेवाः देय् दबूका अध्यक्ष पवित्र वज्राचार्य, प्रदेश सांसद हरिप्रभा खड्गी लगायतका अतिथिहरु उपस्थित हुनुभएको छ ।

हलिं नेवाः दबू (वर्ल्ड नेवार अर्गनाइजेशन) नेपाल च्याप्टरका अध्यक्ष सुरेन्द्र भक्त श्रेष्ठका साथै केन्द्रीय उपाध्यक्ष शाक्य सुरेनले आफ्नो मन्तब्य राख्नु भएको सोही कार्यक्रममा लोककवि राजभाइ जकःमिले लेख्नुभएको हलिं नेवाः मे र नेपाः च्याप्टरबाट प्रकाशित नेवाः स्मारिका पनि सार्वजनिक गरिएको छ ।

त्यसै गरी सञ्चार दूतका रुपमा विराजकाजी राजोपाध्याय, युवा दूतका रुपमा नितिक डंगोल तथा सांस्कृतिक दूतका रुपमा मदनकृष्ण श्रेष्ठ र भिन्तुना जोशीलाई समेत प्रमाण पत्र प्रदान गरिएको छ ।