महंगियो कुखुराको मासुको मूल्य !

काठमाडौं – दशैं र तिहारको समयमा सस्तिएको ब्रोइलर कुखुराको मासु जाडो मौसममा मूल्य वृद्धि भएको छ । कोरोना महामारीले गर्दा अधिकांश होटल तथा व्यवसाय बन्द भएसँगै कुखुराको मासुको खपत कम भएको र उत्पादन धेरै भएकाले सस्तिएको कुखुराको मासुको मूल्य जाडो मौसमसँगै बढेको छ ।

अहिले कोरोना संक्रमण पूर्णरुपमा नियन्त्रणमा नआए पनि अधिकांश व्यवसायहरु सञ्चालन भइरहेका छन् ।

असोज-कात्तिकमा कुखुराको मासुको मूल्य प्रति केजी २०० देखि २४० रुपैयाँसम्म थियो । तर, मंसिर महिना यता विस्तारै चिसो बढेकाले हरेक वर्ष झैं यो वर्ष उत्पादन कम भई कुखुराको मासुको मूल्य महंगो भएको व्यवसायी बताउछँन् । हाल बजारमा कुखुराको मासुको मूल्य प्रति केजी ३७० देखि ४०० रुपैयाँसम्म बिक्री भइरहेको छ ।