ललितपुर एमालेलाई ठूलो धक्का, पूर्व उपाध्यक्ष सिलवाल समाजवादी प्रवेश

ललितपुर – नेकपा एमाले बागमती प्रदेश कमिटी सदस्य तथा ललितपुर जिल्ला कमिटीका पूर्व उपाध्यक्ष श्याम कृष्ण सिलवाल नेकपा (एकीकृत समाजवादी) प्रवेश गरेका छन् ।

उनी गत स्थानीय निकायको निर्वाचनमा एमालेका गोदावरी नगरपालिका मेयरका उम्मेदवार पनि रहेका थिए ।

पार्टी केन्द्रीय कार्यालयमा नेकपा (एकीकृत समाजवादी) का अध्यक्ष माधव कुमार नेपालले उनलाई पार्टी प्रवेश गराएका हुन् । पार्टी प्रवेश कार्यक्रममा नेकपा एसका उपाध्यक्ष प्रमेश कुमार हमाल, केन्द्रीय कमिटी सदस्य अमृत नाथ तिमल्सिना, ललितपुर जिल्ला कमिटी सचिव सुदर्शन मिश्रलगायतको उपस्थिती रहेको थियो ।

कोभिड महामारीका कारण ठूलो संख्यामा पार्टी प्रवेश कार्यक्रम नगरिएको बताउँदै कोभिडको अवस्था सामान्य हुनासाथ ठूलो संख्यामा ललितपुरमा थप पार्टी प्रवेश कार्यक्रम गरिने ललितपुर जिल्ला सचिव मिश्रले जानकारी दिए ।