पेट्रोलियम पदार्थको मूल्य अझ बढ्ने पक्का, आईओसीले बढेको मूल्यसूची पठायो

काठमाडौं – इण्डियन आयल कर्पोरेशन (आईओसी) ले पेट्रोलियम पदार्थको मूल्य बढेका मूल्यसूची पठाएको छ ।

आईओसीले पठाएको मूल्यसूचीमा पेट्रोलमा प्रतिलिटर ३.८९, डिजेलमा ३.०८, मट्टितेलमा १०.३० र हवाई इन्धनमा ३.३२ रुपैयाँले बढेको नेपाल आयल निगमले जनाएको छ ।

अहिलेको स्थितिमा पेट्रोलमा २० रुपैयाँ ५२ पैसा, डिजेलमा १६ रुपैयाँ ८ पैसा र एलपी ग्यासमा प्रतिसिलिण्डर ६ सय ६५ रुपैयाँ ३४ पैसा घाटा रहेको छ ।

नयाँ मूल्य अनुसार निगमलाई आगामी १५ दिनमा करीब ३ अर्ब ९ करोड घाटा हुने स्थिति देखिएको पनि निगमद्वारा जारी विज्ञप्तिमा उल्लेख छ ।

चालू आर्थिक वर्ष २०७८/७९ को अहिलेसम्म निगमले करिव २८ अर्ब नोक्सानी व्यहोरिसकेको छ ।

रुस र युक्रेनबीच युद्ध चर्किएसँगै अन्तर्राष्ट्रिय बजारमा पेट्रोलियम पदार्थको मूल्य ह्वात्तै बढेको छ । एकपटक ४० डलर प्रतिब्यारेलमा आउने तेल अहिले १ सय डलर प्रतिब्यारेलको हाराहारीमा पुगिसकेको छ ।