आईसीसी विश्वकप लिग– २ : नेपाल ओमानसँग १३ रनले पराजित

आईसीसी क्रिकेट विश्वकप लिग–२ अन्तर्गतको खेलमा नेपाल ओमानसँग १३ रनले पराजित भएको छ । बिहीबार राति अमेरिकाको टेक्सासस्थित पर्लल्याण्डमा भएको खेलमा नेपालले उक्त हार व्यहोरेको हो ।

सुरुमा ब्याटिङ गरेको ओमानले ५० ओभरमा २११ रन बनाएको थियो । जसमा उसले ८ विकेटको क्षति व्यहोरेको थियो । ओमान विरुद्ध जवाफी ब्याटिङ गरेको नेपालले ५० ओभर नपुग्दै सबै विकेट गुमाउन पुग्यो । नेपालले ४९ ओभर ४ बल खेल्दा सबै विकेट गुमाएर १९८ रन मात्र बनाउन सकेको थियो ।

खेलमा नेपालका लागि करण केसीले ५ विकेट लिए भने सन्दीप लामिछानेले २ र सोमपाल कामीले १ विकेट लिए । उता ओमानका जीसान मक्सुद र खावर अलीले समान ३–३ विकेट लिए र बिलाल खानले २ विकेट लिएका थिए ।

लिगमा नेपाल १३ खेलबाट १२ अंकसहित छैटौं स्थानमा यथावत रहेको छ । अब शनिबारको खेल नेपालले अमेरिकासँग खेल्ने तय भएको छ ।