प्रधानमन्त्रीको अमेरिका भ्रमणबारे संसद र जनतालाई जानकारी दिन माधव नेपालको माग

प्रधानमन्त्री शेरबहादुर देउवाको हुन लागेको अमेरिका भ्रमणबारे संसदमा चर्को कुरा उठिरहेको छ । यसै क्रममा नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले पनि उक्त भ्रमणबारे संसदलाई जानकारी दिनुपर्ने बताएका छन् ।

प्रधानमन्त्री देउवाले अमेरिका के र कुन प्रयोजनका लागि हुन लागेको हो, सो बारे संसद र जनतालाई जानकारी गराउनुपर्ने अध्यक्ष नेपालको भनाइ छ । आइतबार नेकपा एमालेका नेता एवं पूर्व परराष्ट्रमन्त्री प्रदीप ज्ञवालीले पनि प्रधानमन्त्रीको अमेरिका भ्रमण रहस्यमय हुन लागेको भन्दै यसबारे संसदलाई जानकारी गराउन माग गरेका थिए ।

आज अध्यक्ष नेपालले संसदको अन्तर्राष्ट्रिय सम्बन्ध समितिमा नेपालको परराष्ट्र नीतिबारे बोल्दै प्रधानमन्त्रीको अमेरिका भ्रमणबारे जानकारी माग गरेका हुन् । उनले उक्त भ्रमणका कारण छिमेकी मुलुक चीन र भारतसँगको सम्बन्धमा खलल हुने अवस्था आउन नहुने बताए ।

नेपाललाई अमेरिकी सुरक्षा छाताभित्र राख्ने कोसिस भइरहेको र यसैबारे प्रधानमन्त्रीको भ्रमण हुन लागेको आशंका गरिएका बेला नेता नेपालले स्वतन्त्र र सार्वभौम राष्ट्रको मर्यादा भुल्न नहुने बताए । उनले नेपालको असंलग्न परराष्ट्र नीतिमा विचलन आउने कुनै पनि भ्रमण या सम्झौता हुन नहुने समेत बताए ।