मन्त्री भइसकेको मान्छे हुँ, तर दुई थरी तरकारी किनेर खाने हैसियत छैनः ज्ञवाली

एमाले उप–महासचिव प्रदीप ज्ञवालीले आर्थिक अवस्थाका कारण आफ्नो घरमा दुईथरी तरकारी पकाउने स्थिति नरहेको बताएका छन् ।

एमाले सम्वद्ध उपभोक्ता हित संरक्षण तथा सुशासन विभागले सोमबार राजधानीमा गरेको कार्यक्रममा ज्ञवालीले मूल्यवृद्धिले सीमा नाघे पनि सरकारमा बसेकाहरुलाई चासो नभएको बताए । मूल्यवृद्धिका कारण सर्वसाधारणको चुल्हो बल्न समस्या रहेको उनको भनाइ थियो ।

‘दुईथरी तरकारी पकाउन सक्ने अवस्था मेरो चाहिं छैन’, उनले भने, ‘मन्त्री भएको मान्छे हुँ । साँसद पनि धेरै वर्षदेखि छु ।’ मन्त्री भइसकेको मानिसले घरमा एकथरी तरकारी पाक्ने छ भन्ने कुराको सम्झौता गर्नुपर्ने स्थिति रहेको बताए ।

ज्ञवालीले सरकारले कृत्रिम मूल्यवृद्धि गरेको आरोप लगाए । परमाशेदले बनेको वर्तमान गठबन्धन सरकार भ्रष्टाचारी, कालाबजारिया र कमिसनखोरको संरक्षणमा तल्लीन रहेको आरोप उनको थियो ।