कांग्रेसले बखेडा गरिरहे वाममोर्चा बनाएर चुनावमा जाने प्रचण्डको चेतावनी

माओवादी केन्द्रका अध्यक्ष पुष्पकमल दाहाल प्रचण्डले सिट बाँडफाँडमा कांग्रेसले बखेडा गरिरहे वाममोर्चा बनाएर चुनावमा जाने चेतावनी दिएका छन् ।

ललितपुरको धोबीघाटस्थित एक पार्टी प्यालेसमा माओवादी बागमती प्रदेशको विस्तारित बैठकलाई आइतबार सम्बोधन गर्दै उनले कांग्रेसको बखेडाका कारण सिट बाँडफाँट टुंगो लाग्न नसकेको बताए ।

सत्तारुढ गठबन्धनमा आवद्ध चार वामपन्थी शक्तिबीच छुट्टै गठबन्धन गरेर जाने प्रचण्डले बताएको एक केन्द्रीय सदस्यले बताए । यद्यपि काँग्रेससँगको गठबन्धन बाध्यात्मक परिस्थितिको उपज भएकाले तोड्ने पक्षमा नरहेको उनको भनाइ थियो ।

‘काँग्रेसले अति नै गरेछ भने चार वाम दलबीच मात्र गठबन्धन गरेर चुनावमा जान्छौं’, उनले भने, ‘काँग्रेसले धेरै भाउ खोजेका कारण सिट बाँडफाँटमा कुरा मिल्न सकेको छैन ।’

डा. बाबुराम भट्टराई र वामदेव गौतमले पनि माओवादीकै चिन्हबाट चुनाव लड्ने तयारी गरेकाले माओवादीको स्वीकार्यता बढेको प्रचण्डले बताए । उनले वामपन्थी दलमध्येको पहिलो दल बन्नबाट माओवादीलाई कसैले रोक्न नसक्ने ठोकुवासमेत गरे ।

स्थानीय निर्वाचनमा जस्तो अन्तर्घात भए सह्य नहुने चेतावनी पनि उनले दिए । ५० वटा स्थानीय तह आन्तरिक किचलोका कारण गुमेको प्रचण्डले बताए ।