काँधमा राष्ट्रिय झण्डा र हातमा लौरो लिएर स्वतन्त्र उम्मेदवारहरुको लौरो अभियान घोषणा

मंसिर ४ गतेको प्रतिनिधिसभा तथा प्रदेश सभाको निर्वाचनमा स्वतन्त्र रुपमा उम्मेदवारी दिने तयारीमा रहेका युवाहरुले ‘स्वतन्त्र तथा वैकल्पिक शक्तिको लौरो अभियान’ को घोषणा गरेका छन् ।

यस अभियानको संयोजन स्थानीय तहको निर्वाचन २०७९ मा काठमाडौँ महानगरपालिकाबाट मेयरमा उम्मेदवारी दिएका सुमन सायमीले गरेका छन् ।

ललितपुर सानेपा स्थित हेरिटेज गार्डेनमा आयोजित उक्त घोषणा कार्यक्रममा स्वतन्त्र उम्मेदवारहरु काँधमा राष्ट्रिय झण्डा र हातमा लौरो लिएर प्रस्तुत भएका थिए ।

आज घोषणा गरिएको उम्मेदवारहरुमा, प्रतिनिधिसभा तर्फ काठमाडौँ – २ बाट ई. रोहन कार्की, काठमाडौँ – ५ बाट मधुसुदन पाठक, काठमाडौँ – ८ बाट सुमन साय्मी, काठमाडौँ – ९ बाट विद्या श्रेष्ठ महर्जन, ललितपुर – ३ बाट राजाराम तण्डुकार, भक्तपुर – २ बाट ‘दह्रो स्तम्भ’ लोकेन्द्र र रुपन्देही – ५ बाट भिष्म राना रहेका छन् ।

प्रदेश सभा तर्फ काठमाडौँ – २ (क) बाट विनोद बजगांइ, उदयपुर – १ (क) बाट गजेन्द्र कुमार भगत, महोत्तरी – २ (ख) बाट अनिल कुमार पाण्डे र सुनसरी – १ (क) बाट विजय कालिकोटे रहेका छन् ।

कार्यक्रममा स्वतन्त्र उम्मेदवारहरुले छोटकरीमा आफ्नो भनाइहरु राखेका थिए ।